Shimura giendorso ni Frasco nga mopuli isip presidente sa LMP
CEBU, Philippines — Giendorso ni Liloan Mayor Christina Garcia- Frasco si Daanbantayan Mayor Sun Shimura nga maoy sunod nga mahimong presidente sa League of Municipalities in the Philippines (LMP)-Cebu Chapter.
Si Frasco maoy kasamtangang presidente karon sa LMP-Cebu Chapter ug mobiya kini sa maong position human gitudlo ni President elect Ferdinand “Bongbong” Marcos Jr. nga sunod nga kalihim sa Department of Tourism.
Matud ni Frasco nga iyaha na nga na estorya si Gobernador Gwendolyn Garcia kalabot niini ug nisuporta usab ang gobernador.
“Coming into this next term, I am fully confident that Mayor Sun Shimura will be able to not only continue what we have started but also lead the LMP forward to the same strides of relevance, innovation, effectiveness, and importance that we have been able to give the organization in this term”, matud ni Frasco.
Si Shimura sa iyang bahin, nagkanayon nga nagpasalamat siya kang Frasco ug Garcia sa pag-endorso kaniya.
Giangkon ni Shimura nga bug-at kini nga responsibilidad kon ugaling siya ang mapili pagka-presidente sa LMP-Cebu Chapter apan andam usab kini niya nga dawaton.
Ug kon ugaling mapili man pagka presidente sa LMP atol sa ilang eleksiyon sa Agosto karong tuiga, matud ni Shimura iyang ipadayon ang mga programa nga nasugdan ni Frasco.
Gihangyo ni Shimura si Consolacion Mayor elect Nene Alegado nga maoy iyang mahimong bise presidente.
Sa kasamtangang administrasyon karon sa LMP si Shimura maoy nagsilbi nga treasurer. BDB (BANATNEWS)
- Latest
