DILG di na mokiha ni Garcia ug probinsya

CEBU, Philippines — Human sa mainitong pagbinayloay og mga mainitong mga pulong mahitungod sa pagsuot og facemask dinhi sa lalawigan sa Sugbu, gikatahong nagkasinabot na sila si Interior Secretary Eduardo Año ug Gobernador Gwendolyn Garcia kalabot sa polisiya sa naulahi.

Gibutyag ni bokal John Ismael Borgonia sa tersero distrito nga niadtong Martes sa hapon nanawag si Año sa gobernador ug ang duha naghisgot kabahin niini.

Matud pa nga nagkasinabot ang duha ka opisyal nga wala nay kasong ipasaka batok sa Probinsya.

Una niini miisyu og ultimatum si Año batok sa gobernador ug sa probinsya sa Sugbu nga pakorihian ang executive order ni Garcia nga nag-ingong optional nalang ug himuong makatarunganon ang pagsuot og facemask sa gawas sa panimalay.

Gani ang Hunta Probinsyal mipagawas sab og ordinansa bahin sa pag-rationalized sa paggamit sa facemask nga nagpalig-on sa EO ni Garcia.  Apan si Año mihulagway nga nakalapas sa direktiba sa presidente ang maong ordinansa ug EO kay si Presidente Rodrigo Duterte miingon nga magpabilin ang pagsuot og facemask hangtud sa kataposan sa iyang termino.

“Dili na to ipadayon ang show cause order ang kadtong i-rectify, amend so wala na to. In other words ni give in na si Secretary Año sa atoang ordinance ug sa order ni Gov. Gwen about face mask,” matud ni Borgonia.

Matud ni Borgonia, ang kapitolyo mohimo sa Implementing Rules and Regulation (IRR) sa ordinansa nga ilang gipasar alang sa pagpatuman niini. —IBM (BANATNEWS)