Dugang nurses motabang sa toktok bakuna
CEBU, Philippines — Dugang mga nurses gikan sa Department of Health Central Visayas ang gi-deploy sa Cebu City aron tabangan ang siyudad nga mabakunahan ang mga senior citizens nga wala pa mabakunahi.
Gitug-an ni Dr. Jeffrey Ibones, Officer-in-Charge sa CCHD kaniadto pa gyud nila gitinguhang mabakunahan ang tanang senior citizens ug ubang mga residente sa siyudad lakip niini ang pagpa-booster shot.
Sa datos sa Cebu City Health Department 70 porsiyento na sa mga senior citizens sa Cebu City ang nabakunahan apan duna pay 10,000 nga wala pa makadawat sa bakuna.
“Among gipangtawagan ang uban, nakita naman nato ang uban ana nabakunahan na sa ubang lugar, ang purpose sa atong ‘Toktok Bakuna’ to prioritize katong mga senior ug katong wala pa gyud magpabakuna for the first dose nila, gikuan ni sa Department of Health nga by the end of June 30 daghan na gyud ta mabakunahan ilabi na gyud sa senior citizens,” sigon ni Ibones.
Sa ‘Toktok Bakuna’ sa Cebu City Health, manuktok gyud sila sa kabalayan aron awhagon ang mga wala pa nagpakuna nga magpabakuna. Apan sigon ni Ibones nga gipaabot na nila kauban sa DOH-7 nga kadtong nabilin nila nga wala mabakunahi mao gyud ang dili gustong magpabakuna.
Apan bisan pa niini padayon nila silang awhagon aron maturukan sa COVID-19 vaccines.
“Hopefully maka-realize sila nga unsa ka importante ang bakuna sama sa giingon ni Mayor Mike (Rama) nga vaccination is the way to liberation mao ng nahimo natang level 1 at the same time ni-open atong business tungod kay daghan-daghan naman gyud ta nabakunahan sa siyudad sa Sugbo.
Unang giadto sa Cebu City Health Department sa ilahang Toktok Bakuna mao ang Barangay Lahug.
Gipahibawo sab ni Ibones nga naa pa ang vaccination sites diha sa SM City Cebu, SM Seaside City Cebu, Ayala Center Cebu ingon man ang Robinson’s Galleria. —IBM (BANATNEWS)
- Latest
