‘Asset’ sa polis gipusil patay, suspetsado napatay sa polis

CEBU, Philippines — Usa ka giingong police asset gipusil patay ug ang suspetsado napatay human kini giingong namusil ngadto sa mga polis ug nabaslan diha sa Barangay Poblacion Oriental, Lungsod sa Consolacion niadtong Martes sa hapon.

Ang giingong police asset mao si Renante Gerundio, ulitawo, taga Barangay Nangka sa nahisgutang lungsod.

Samtang ang suspetsado mao si Ronald Judilla, taga Barangay Tugbungan sa mao gihapong lungsod.  Ang Consolacion Police Station nakadawat kini og report kabahin sa insidente sa pagpamusil mga alas 2:30 sa hapon diha sa lugar nga nahitaboan.

Si Police Lieutenant Colonel officer-in-charge sa Consolacion Police Station ang nangulo sa pagresponde  sa maong insidente.

Base sa imbestigasyon sa kapolisan nga giingong tuyo nga patyon sa suspetsado ang biktima.

Ang biktima niadtong higayona natulog kini diha sa sulod sa ilang balay dihang gipusil sa makadaghan nga higayon sa suspetsado. Ang biktima daling gidala ngadto sa tambalanan apan gideklara kini sa doktor nga patay na nga naabot sa tambalanan.

Nasayran nga ang suspetsado nalambigit kini og mga kalapasan sa balaod sama sa ilegal nga kalihokan.

Matud ni Police Staff Sergeant Arnold Rusiana, desk officer sa Consolacion Police nga atol sa ilang gihimo nga hot pursuit operation nakit-an ang suspetsado ug gipahibalo kini sa team nga mga polis sila ug gimandoan kini nga motahan sa iyang kaugalingon.

Apan wala kini nipatuo ug namusil ngadto sa mga polis swerte nga walay naigo sa habig sa mga polis sa maong pagpamusil.

Ang mga polis nibawos og pusil ngadto sa suspetsado isip depensa usab sa ilang kaugalingon.

Ang suspetsado nakaangkon og samad pinusilan ug nakahimo pa kini sa pag-ambak diha sa sapa. Ang suspetsado daling gidala usab ngadto sa tambalanan apan gideklara usab kini sa doktor nga patay na nga naabot diha sa tambalanan.

Nakuha gikan sa lugar nga nahitaboan ang usa ka pistola nga adunay usa ka buhing bala sa chamber niini, usa ka magazine nga adunay duha  ka buhing  bala ug unom ka kabhang sa .9mm pistol. —BDB (BANATNEWS)