Paghatag og fuel discount gilugwayan sa Cebu City

CEBU, Philippines — Gipahibawo ni Atty. Gerry Carillo,  chairman sa Cebu City Disaster Risk Reduction Management Council (CCDRRMC) nga lugyawan nila hangtud sa buwan sa Disyembre ang ilang fuel discount card nga tabang alang sa mga drayber nga apektado sa  padayong pagsaka sa presyo sa produktong petrolyo.

Sayo pa, ang kagamhan sa Dakbayan sa Sugbo uban ang Department of Energy Visayas Field Office ug First Energy Corporation nilusad sa “Gasolina Mo, Sagot Ko Program” aron makatabang sa mga motorista nga apektado sa padayong pagsaka sa presyo sa produktong petrolyo.

Ang First Energy Corporation nga franchisee sa Phoenix Gasoline Station unang nisanong sa hangyo sa  siyudad aron makatabang sa mga motorista pinaagi sa paghatag og discount kada patobil nila sa Phoenix Gasoline Stations.

Duha ka buwan ra unta ang tagal sa fuel discount card apan gumikan sa mga hangyo sa mga motorista ug padayon nga pagtaas sa presyo sa produktong petrolyo ang siyudad nakadesisyon nga lugwayan kini.

Matud ni Carillo nga gimandoan siya ni Mayor Michael Rama nga makig-alayon sa ubang oil companies aron madugangan ang gasoline stations nga mohatag og discount ilabi na karon nga ilaha kining gilugwayan.

Gibutyag ni Carillo nga ang maong oil companies ilahang igrupo aron magbutang og oil depot diha sa South Road Properties diin walay gasto ang siyudad niini lugar lang ang ilahang itanyag aron mabuhatan og oil depot.

Gipanglantawan sa kagamhanan sa siyudad nga makamenos ang mga motorista sa pagpatobil sa maong plano sa pagpatukod og oil depot. —BDB (BANATNEWS)