Mga tunghaan gustog 100% F2F classes

CEBU, Philippines — Mga kadagkoan sa nagkadaiyang kolehiyo ug unibersidad sa Cebu City mihangyo kang Mayor Michael Rama nga lugakan pa ang pandemic restrictions ini og sugod na unya sa klase karong bulan sa Agosto.

Atol sa ilahang meeting niadtong Lunes mihangyo sila nga tugotan ang 100 percent face-to-face learning capacity sa mga pribadong tunghaan sa Academic Year 2022-2023 nga magsugod sa buwan sa Agosto. 

Si Atty. Joan Largo, Assistant Vice President for Academic Affairs sa University of San Carlos(USC) miingon nga ang 50-50 learning capacity dili magsilbi kay naobserbaran nga sagad sa mga tinun-an naglisod sa pag-apas sa ilahang shifting schedules.

“Among na bantayan nga lisod man gud mag-shifting sa ilang schedule. That is why we are here to meet with you to discuss on this matter,” matud ni Largo ngadto ni Rama.

Si Atty. Paul Yabao, Presidente sa University of Southern Philippines Foundation mikuyog kang Atty. Largo ug nangulo sa ubang school officials diin apil na sila si Fr. Randy Figuracion, SDB, rector ug President sa Don Bosco Technical College-Cebu.

Ang mga opisyales sa University of San Jose-Recoletos, Cebu Institute of Technology-University, University of Cebu, Southwestern University, University of the Visayas, Cebu Institute of Medicine ug Velez College mitambong sab sa meeting.

Gihimug-atan nila nga ang Inter-Agency Task Force guidelines nag-require nga seguradohon nga nituman sa health ug safety protocols ang mga tunghaan.

Giangkon sa mga officials nga nagkinahanglan sila og oras aron pag-reconstruct sa classrooms ug ubang school facilities aron ma-meet ang requirements sa IATF.

Isip kompromiso, si Largo miingon nga miuyon sila nga i-require ang tinun-an apil na sab ang mga magtutudlo ug school staff nga fully vaccinated sa dili pa maka-enroll o makatrabaho.

“Ang amoa lang gyud hangyo is to lessen (the restriction) because when face-to-face classes start, we will also be requiring our students and our staff to be fully vaccinated,” dugang ni Largo.

Si Rama sa iyang bahin miasoy nga mopagawas siya og direktiba alang sa special vaccination days sa mga tunghaan ug colleges sa siyudad.

“Atong tawag ani mao ang ‘Balik Eskwela Extravaganza, Bakuna Para Economiya Mosaka’ to campaign para sa bakuna and involves your schools. Inyoha ang venue ug kamo sad ang motabang og kampanya ani,” ni Rama pa.  Matud ni Rama nakasabot siya sa sentimiyento sa mga private school executives ug makigtagbo kini sa iyahang management team aron tukion kini.

Giawhag sab sa mayor ang grupo nga suportahan ang pagpamakuna sa siyudad.— IBM (BANATNEWS)