Pagpirma ni Michael Rama sa Moa sa proyekto tali sa psa giuyonan

CEBU, Philippines — Gitugotan sa Cebu City Council si Mayor Michael Rama sa pagpirma sa Memorandum of Agreement (MOA) kalabot sa gisugyot nga proyekto nga nag-ulohan og “Philsys Birth Registration Assistance Project for the City of Cebu” tali sa dakbayan ug sa Philippine Statistics Authority (PSA).

Ang buhatan sa City Civil Registrar miduso sa kopya sa MOA ngadto sa opisina ni vice Mayor Donaldo Hontiveros.

Si Konsehal Phillip Zafra maoy niduso sa resolusyon nga giaprobahan dayon sa konseho.

Sa suwat nga gipadala ni  City Civil Registrar Evangeline Abatayo , tumong sa maong proyekto mao ang pag-cover sa gi-survey nga unregistered birth sa siyudad sa Sugbo nga moabot ngadto sa  14,861 gikan sa katapusan nga  census.

Pipila niini mao ang indigenous people (IPs) nga nahimutang sa Alaska, Mambaling ug sa kabus nga nanimuyo sa coastal depressed area ug mountain barangays.

Base sa MOA, ang kagamhanan sa dakbayan kinahanglang maghatag og seguridad sa tibuok nga gidugayon sa Philsys Birth Registration Assistance Project; pagtabang sa pagparehistro sa mga aplikante alang sa nalangan nga pagparehistro; ug paghatag sa gikinahanglan nga suporta.

Samtang, ang PSA mopahigayon og Mobile Registration uban sa koordinasyon sa PSA Regional Statistical Services Office, PSA Provincial Statistical Office, ug Local Civil Registry Offices; paghatag sa mga resulta sa verification sa listahan sa mga aplikante nga adunay rekord ug walay record sa PSA database, ug uban pa. —MEL (BANATNEWS)