MCWD nahimong modelo sa water district sa laing nasud
CEBU, Philippines — Ang Metropolitan Cebu Water District (MCWD) maoy gihimong usa sa mga modelo sa pipila ka water district sa laing
nasud. Nasayran nga nisagop ang MCWD og dugang bag-ong teknolohiya sa sistema sa panubig sa pipila ka mga dapit sa Sugbo.
Ang uban nila nga ideya ilang gipaambit sa bag-ohay lang nga 43rd National Convention of the Philippines
Association of Water Districts (PAWD) nga gipahigayon sa Waterfront Cebu City Hotel and Casino.
Ang kalihokan gihimo kagahapon ug gitambongan sa kapin sa 2,000 ka mga inbidwal nga gikan sa water sector gikan sa nagkalain-laing dapit sa nasud.
Nasayran nga ang MCWD maoy host sa maong convention karong tuiga nga dunay tema nga Water governance towards building a better normal”.
Suma pa sa General Manager sa MCWD nga si Stephen D. Yee nga lakip sa tumong sa maong convention mao ang pagbinayloay og mga ideya sa nagkadaiyang water districts sa nasud.
Matud pa niya nga kun dunay panaghiusa, mas makaumol pa og mga bag-ong ideya nga makahatag og kaayohan sa kadaghanan, sama sa mga plano alang sa konserbasyon sa tinubdan sa tubig.
Si Mayor Michael Rama usa sa pinasidunggang dinapit sa kalihokan nipadayag sa iyang dakong pagsuporta sa water sector.
Gani andam si Rama nga makighinabi ngadto sa umaabot nga presidente nga si Ferdinand "Bongbong" Marcos Jr. aron mangayo og suporta alang sa nagkadaiyang programa sa water industry. (BANAT NEWS)
- Latest