Rama gustong patutokan sa CCPO ang mga krimen inay facemasks

CEBU, Philippines — Mimando si Cebu City Mayor Michael Rama sa Cebu City Police Office nga dili dakpon ang mga tawong dili magsul-ob og facemask ug edukahon hinuon sila sa importansiya sa paggamit niini. Ang mando ni Rama may pagka-parehas sa kontrobersiyal nga executive order ni Gob. Gwendolyn Garcia nga nag-ingong dili na mandatory ang face mask sa gawas sa balay gawas nalang kung nagdasok ang mga tawo o dili maayo ang bentilasyon sa gisudlang mga lugar. Nakontrobersiya kini human ang DILG ug ang Malacañang mipagawas og pamahayag nga mopatigbabaw ang direktiba ni Pres. Rodrigo Duterte nga padayonon ang pagsuot og facemask hangtud mapupos iyang termino.

Si Rama miingon nga sa gihimo nilang panagtigom kauban ang ubang stakeholders sa miaging adlaw, nagkahiusa silang tanan nga sa pagkakaron ipabilin una ang paggamit sa facemask. Matud sa mayor gusto niyang tutokan sa kapolisan ang ilang trabaho batok kriminalidad.  “There are things to do, we are not saying there is suspension of the ordinance because the ordinance is there…. There are better things to do, more pressing things when it comes to peace and order, drugs, crime against property, crimes against person, let’s all focus on this … the first and priority make the Cebu City peaceful,” matud ni Rama.  Dili sab buot manginlabot ni Rama sa mga desisyon sa gobernador tungod kay managlahi ang sitwasyon sa siyudad ug sa probinsya.

Sa laing bahin, walay nakitang problema ang Cebu City Police Office sa pagtuman sa mga tawo sa pagsuot kanunay og facemask karon.

Si Police Lieutenant Colonel Janette Rafter, Deputy Director for Operation sa Cebu City Police Office nga nahinabi sa mga tigbalita miingon nga bisan gipaluagan ang mga restriksyon ug wala na sila nanakop og malapason sa health protocols, nakita nila nga nituman niini ang kadaghanan. Apan subli niyang gipahinumdoman ang tanan nga dili molugak sa pagsunod sa health protocols.

Ilahang gitutokan karon ang pagsanta sa mga krimen subay sa kamanduan sa mayor.— Rowena Capistrano/IBM (BANATNEWS)