Magpabilin ang pagsul-ob og facemask
CEBU, Philippines — Kun probinsya sa Sugbo hugot ang baruganan ni Gob. Gwendolyn Garcia nga di na mandatory ang pagsul-ob og facemask sa gawas sa balay, si Cebu City Mayor Michael Rama miingon nga lahi ang sitwasyon didto itandi sa siyudad.
Matud ni Rama sentro ang Cebu City ug maoy sagad tigdawat sa bagang duot sa mga tawo gikan sa lain-laing lugar mao nga kinahanglan pa gihapong magsuot og facemask sa gawas sa panimalay.
Apan giklaro hinoon ni Rama nga wala kini nagpasabot nga dili nila ikonsiderar sa umaabot ang paglugak sab sa pagsul-ob og facemask ilabi na sa mga open spaces.
Matud sa mayor iyaha kining hisgutan unya kauban sa mga stakeholders ug nagampo nga dili lang isalig sa IATF sa World Health Organization ang paghimo nila og mga polisiya.
Sa Talisay City, bisan og ubos kini sa probinsya sa Sugbu, gimando ni Mayor
Gerald Anthony “Samsam” Gullas magpadayon gihapon ang pagpatuman sa pagsuot og facemask diha sa gawas sa panimalay.
Sa Mandaue City, magpabilin gihapon ang pagpasul-ob og facemasks sa gawas sa mga panimalay tungod sa padayong presensya sa Covid-19.
Si Atty. John Edu Ibanez, Chief of Staff ni Mandaue City Mayor Jonas Cortes miingon nga walay gipagawas nga executive order ang mayor nga usbon ang restriksyon bahin sa pagsul-ob og facemask.
Sumala pa ni Ibañez ang maong polisiya nakabase man sa ordinansa mao nga kun duna may himuong kausaban gikinahanglan pa kini amendahan sa Sangguniang Panlungsod.
Ang City Ordinance no. 15-2020-1531 nagsilot sa mga wala magsul-ob og facemask o wala nagtarong pagsuot niini. Sila pamultahon og P5 mil. –Gabriel Bonjoc, Rowena D. Capistrano/IBM (BANATNEWS)
- Latest
