Kagamhanan sa Danao nigahin og P10 milyones alang sa vendors

CEBU, Philippines — Nigahin og P10 milyones nga pundo ang lokal nga kagamhanan sa Siyudad sa Danao alang sa tabang pinansiyal sa mga apektadong manindahay sa nasunog nga merkado pulibko sa siyudad.

Nasayran nga P10, 000 ang gihatag nga cash assistance sa stall holders ug P5,000 sa small space renters.

Gisugdan ang pag-apod apod niadtong Hunyo 6, 2022 ug personal nga ni-supervise niini sila si Mayor Nito Durano ug Bise Mayor Mix Durano ug mga konsehal sa siyudad.

Apil sa mga nahatagan sa maong financial assistance ang mga market vendor kinsa unang nisumiter sa ilang dokumento niadtong Hunyo 4, 2022 diha sa Civic Center sa Danao.

Ang mga wala pa maapil sa payout kadtong mga niapas og sumiter sa dokumento niadtong Sabado, Dominggo ug Lunes.

Nasayran usab nga kinahanglan pa nga ipaubos sa validation ang datos ug proseso sa payroll.

Kagahapon gipadayon ang pag-apod-apod sa nahisgutang hinabang pinansiyal.  Ang mga beneificiary gi-required kini nga makasumiter sa ubang mga dokumento atol sa pagdawat sa hinabang apil na niini ang certification gikan sa City Administration’s Office; verification slip ug valid ID. (BANAT NEWS)