Mga magtutuo nitambong sa Pentecost Sunday

CEBU, Philippines — Niabot ngadto sa 5 mil ka magtutuo gikan sa 40 ka charismatic community sa Archdiocese of Cebu ang nitambong sa Solemnity of the Pentecost Sunday diha sa IC3 Convention Center nga gipangulohan ni Archbishop Jose Palma uban sa kaparian sa Archdiocese of Cebu.

Ang nahisgutang kalihokan unang higayon kini human gibuksan sa pagbalik ngadto sa publiko tungod kay gigamit ang maong lugar sulod sa duha ka tuig isip treatment facility sa Department of Health ug kagamhanan sa Siyudad sa Sugbo sa mga nataptan sa COVID-19.

Mapasalamaton si Palma sa tanang pagpaambit ug testimoniya kay nagpakita lang kini nga matag usa kanato nagkinahanglan sa Espiritu Santo.

Gidasig ni Palma ang mga magtutuo nga makanunayon ang pag-ampo ug bukas ang kasing-kasing sa pagdawat sa Espiritu Santo.

Matud ni Palma nga kong adunay kalipay, adunay kasakit usab hinungdan nga mapasalamaton lang gihapon nga nakalabang sa mga dagkong hagit sama sa COVID-19 ug bagyong Odette tungod kay anaa ang Ginoo, Señor Santo Niño uban usab kang Birhen Maria. —BDB (BANAT NEWS)