Kapolisan sa Talisay niumol og tracker team batok sa mangingilad
CEBU, Philippines — Giumol sa kapolisan sa Dakbayan sa Talisay ang tracker team nga maoy mogukod sa mga mangingilad nga gamiton ang pangalan sa mga opisyal sa siyudad.
Niining ulahi, ang pangalan ni Police Lieutenant Colonel Randy Caballes, hepe sa kapolisan sa siyudad ang gigamit kini sa mangingilad.
Ang mangingilad nagpakaaron ingnon nga si Caballes ug nangayo og contact number sa mga tindahan sa siyudad.
Bag-ohay lang,usa ka babaye ang niduol diha sa buhatan sa city hall aron mangayo og grocery items nga kuno gamiton sa kapolisan alang sa ilang relief operations.
Lain usab nga modus mao ang pagpangayo og P1,000 nga load diha sa tindahan nga nahimutang sa Barangay Tabunok.
Maayo nalang gani kay ni-contact dayon ang maong tindahan sa buhatan sa kapolisan ug nagpakisusi kong tinuod ba nga nangayo sila og load.
Matud ni Caballes nga unta magbinantayon ang tanan tungod sa kadaghang mangingilad nga mogamit og bisan unsa nga klase nga modus.
Giawhag ni Caballes ang katawhan nga kong makamatikod sa ingon ini nga krimen mo report dayon diha sa ilang buhatan aron masikop ang mga kriminal. BDB (BANATNEWS)
- Latest
