Mga traysikol nga way suga gipangdakop sa Talisay
CEBU, Philippines — Gipangdakop ang mga drayber nga nagmaneho og traysikol nga walay mga suga nga nagdagan sa kadalanan sa Dakbayan sa Talisay niadtong Huwebes sa gabii.
Si Jonathan Tumulak, pangu sa City of Talisay-Traffic Development Authority (CT-TODA) nagkanayon nga daghan na ang nagreklamo kanila labot niining mga traysikol nga walay mga suga panahon sa kagabhion.
Asoy pa ni Tumulak nga makapeligro gyud kini sa drayber sa traysikol ug uban pa nga motorista nga ikasugat.
Ang sakop sa CT-TODA uban sa kapulisan nihimo sa operasyon ug ilang gipang isyuhan og citation ticket ang mga nakalapas sa balaud tungod kay ang siyudad adunay ordinansa kabahin niini.
Gawas pa niana, makahigayon sab sila sa pagsusi sa mga dokumento sa mga traysikol kung rehistrado ba gyud kini.
Gilauman nga magpadayon ang ilang operasyon sa bisan asa nga lugar sa siyudad sa Talisay. MEL (BANATNEWS)
- Latest
