Masuso sa duyan naapil sa sunog patay

CEBU, Philippines — Napulo ka buwan nga bata ang namatay sa tambalanan pipila ka oras human kini nakuha gikan sa nasunog nilang panimalay diha sa Purok Dama de Noche, Barangay Looc, Lapu-Lapu City niadtong Martes sa  hapon.

Ang sunog giingong diha nagsugod sa panimalay nga gipuy-an nila ni Joseph Rey Ruiz,26. Ang nakalas mao si Jhon Nicrone Ruiz, 10 ka buwan kinsa nakaangkon og 2nd degree burn sa iyang kalawasan.

Napawong na ang sunog sa pagabot sa mga mirespondeng bombero human dali kining napawong sa mga silingan. Ang balay ginama sa gaay maong paspas kaayong nisalaob.

Matud pa ni SFO1 Teodoro Lauglaug sa Lapu-Lapu City Fire Station naghimo pa sila og imbestigasyon bahin sa sinugdanan niini.

Apan sa inisyal nilang impormasyong nahipos, nagluto sa pugon ang inahan sa masuso nga nigamit og kahoy nga sugnod. Gikatahong gipaanukan ang lining-ag ug migawas ang inahan sa bata kay apason ang bana niini nga nipalit og sud-an.

Apan gikatahong kalit nga nasunog ilang balay, ang masuso natulog sa duyan anang tungora. Ang masuso nakuha sa mga silingan diha na sa ubos nga naputos og mga paso ang kalawasan.

Gidala kini sa tambalanan apan sumala pa ni Laug-laug nakutloan kini sa iyang kinabuhi tungod sa mga paso.

Sa nakuha nga kasayuran sa Banat News ang bata namatay tungod sa Cardiopulmonary arrest, acute kidney injury, partial thickness burn 60 percent ug acute septic shock, base kini sa death certificate sa bata.

Ang danyos sa maong sunog P3 mil kay ang kusina sa panimalay sa mga Ruiz lang ang naugdaw.

Samtang P10 mil usab ang danyos sa sunog nga niulbo sa may North Road Highway, Barangay Labogon Mandaue City, alas nuybe kwarentay kwatro sa buntag adlaw nga Huwebes.

Ang nasunog usa ka establisimento nga iya sa Premio Corporation nga usa ka motorcycle dealer.

Padayon pang giimbestigar ang hinungdan niini.— IBM (BANATNEWS)