Cebu City manghatag na sa hinabang sa senior citizens

CEBU, Philippines — Gikatakda karong Sabado ang pagpanghatag sa kagamhanan sa Dakbayan sa Sugbo sa duha ka buwan nga financial assistance sa mga senior citizen sa siyudad.

Matud ni Mare Vae Reyes, Cebu City Treasurer nga 90,788 ka senior citizens sa Ceb City ang makadawat sa ilahang tag P2,000 nga financial assistance alang kini sa buwan sa Abril ug Mayo ug nikabat ngadto sa P181 milyones ang gitagana nga pundo sa siyudad alang niini.

Ang financial assistance makuha pinaagi sa cash card ug alang niadtong mga makadawat niini aduna sila’y regular payroll diha sa mga kabarangayan ug sa 3,773 ka bed ridden nga senior citizens i-house-to-house ang paghatag sa ilang ayuda.

Ang Cebu City Treasurer’s Office nangayo kini og tabang sa mga department head pagpanghatag sa financial assistance diha sa 80 ka barangay.

Ang nahisgutang mga department head idestino kini diha sa nagkalain-laing barangay.

Sa pagkuha sa ayuda ang mga senior citizen giawhag nga magsul-ob og facemask ug imentinar ang social distancing.

Gihangyo usab ang mga senior citizen nga dili mosayo og adto sa lugar diin ihatag ang financial assistance tungod kay whole day man ang pagpanghatag sa ayuda pwede sila nga moadto og udto o hapon tungod kay mingaw naman anang mga orasa.

Sa laing bahin, niabot ngadto sa 1,219 ka indibidwal kinsa niserbisyo sa nilabay’ng  piniliay ang nakadawat na sa ilang suholan.

Nasayran nga ang Talisay City Comelec nahuman na sa pagpanghatag sa honorarium sa mga tawo nga niserbisyo sa nilabay’ng eleksiyon.

Ang mga nakadawat sa honorarium gilangkuban kini sa electoral board, support staff ug uban pa nga nitabang sa Comelec.

Matud sa Comelec Talisay nga ang kataposang nakadawat sa honorarium mao ang niserbisyo sa Persons Deprived of Liberty (PDL) sa Buruea of Jail Management and Penology (BJMP) sa Talisay City Jail. —Gabriel C. Bonjoc/BDB (BANATNEWS)