Inahan patay, anak ug kapuyo parehong angol

CEBU, Philippines — Patay ang usa ka inahan ug naangol ang anak ug kapuyo niini human nawagtangan og prino ang gisakyan nila nga motorsiklo ug nibangga ngadto sa laing motorsiklo niadtong Martes sa hapon diha sa Barangay Tapul, Dakbayan sa Talisay.

Ang namatay mao si Danica Gesalan, 27 –anyos,  taga Barangay Tabunok sa maong siyudad.

Ang 3-anyos nga anak ni Gesalan ug kapuyo niini nga si Paulo Rollorata 25-anyos pareho kining nangaangol.

Si Jonathan Tumulak, pangulo sa City of Talisay-Traffic Operation and Development Authority (CT-TODA) nibutyag nga gikan nanuroy ang pamilya diha sa Sitio Campinsa sa Barangay Tapul. Dihang nagbiyahe na sila padulong  na nga mopauli nawagtangan og prino ang motorsklo nga ilang gisakyan ug wala na kini makontrolar ni Rollorata ug nibangga ngadto sa laing motorsiklo.

Natagak sa kimba nga bahin diha sa lugar nga nahitaboan ang mga biktima ug napantok sa bato ang ulo ni Gesalan nga giingong hinungdan sa kamatayon niini.

Ang mga biktima daling gidala ngadto sa tambalanan apan nakabsan sa kinabuhi si Gesalan.

Sa laing bahin, nisaka ngadto sa 20 porsyento ang gidaghanon sa disgrasya sa Dakbayan sa Talisay karong tuiga.

Base sa talaan sa CT-TODA, niabot na sa 800 ang gidaghanon sa nahitabong disgrasya diha sa kadalanan sa siyudad gikan sa buwan sa Enero hangtud sa tung-tunga nga bahin sa buwan sa Mayo.

Matud ni Tumulak nga niabot ngadto sa 20 porsyento ang pagsaka sa disgrasya ikompara sa niaging tuig.

Sa buwan sa Enero niining tuiga adunay 183 ka disgrasya sa kadalanan ang natala sa CT-TODA, 170 sa buwan sa Pebrero, 197 sa buwan sa Marso ug 179 sa buwan sa Abril.  Gikan sa Mayo 1 hangtud sa Mayo 15, 2022 niabot sa 78 ang gidaghanon sa disgrasya ang natala sa CT-TODA. —BDB (BANATNEWS)