EO sa probinsiya kabahin sa bird flu sundon sa Cebu City

CEBU, Philippines — Dili na mopagawas og executive order ug sundon nalang sa kagamhanan sa Siyudad sa Sugbo ang lakang nga gihimo sa Probinsiya sa Sugbo aron dili makasulod ang Avian Influenza o bird flu.

Sayo pa, gipadayon sa Kapitolyo ang pag-ban sa pagpasulod sa live poultry ug wild bird sa Probinsiya sa Sugbo gikan sa mga lugar nga adunay kaso sa bird flu.

Si Gobernador Gwendolyn Garcia niluwat sa Executive Order No. 14 pagpatuman og ban sa pagpasulod og live birds (poultry ug non-poultry) lakip na ang day-old chicks, day-old pullets, ready-to-lay pullets, ducks, quails, game fowls, pigeons ug pet birds gikan sa Luzon, Mindanao ug mga nasud nga apektado sa Avian Influenza.

Ang live birds nga gikan lang sa Visayas area mamahimong makasulod sa Probinsya sa Sugbo apan kinahanglang adunay mapakita nga mga dokumento sama sa veterinary health certificate gikan sa provincial veterinarian, veterinary shipping permit nga giisyu sa Bureau of Animal Industry/deputized veterinary quarantine officers; ELISA/ HI/ RT PCR negative laboratory test result sa avian influenza; certification AI-free status nga giisyu sa provincial veterinarian nga walay outbreak sa avian influenza sa gigikanan sa maong live birds o langgam sulod sa pito ka adlaw; ug Land Transport Permit nga giisyu sa Department of Environment and Natural Resources alang  sa wild ug domestic birds.

Sa mga poultry meat products sama sa domestic poultry meat, imported poultry meat ug processed poultry ug canned poultry products itugot kini nga makasulod sa Probinsiya sa Sugbo apan kinahanglan nga ang shipper o trader makapakita og meat inspection certificate nga giissue sa National Meat Inspection Service (NMIS) ug veterinary shipping permit.

Sa mga processed poultry products kinahanglan usab nga makapakita ang shipper o trader sa license to operate ug certificate of product registration gikan sa Food and Drug Administration (FDA).

Ang mga itlog sama sa balut, table eggs, salted eggs, quail eggs ug hatching eggs itugot usab ang pag-transport niini apan kinahanglang adunay veterinary health certificate, veterinary shipping permit, ug RT-PCR negative test sa avian influenza.

Ang mga imported poultry gikan sa mga nasud nga walay kaso sa avian influenza padulong sa Sugbo tugotang makasulod apan kinahanglang adunay dokumento sama sa SPS import clearance, landing permit, notice of quarantine ug veterinary shipping permit kinahanglan usab nga adunay koordinasyon sa Cebu Provincial Veterinarian.

Matud ni Rama nga ang pangulo sa Department of Veterinary Medicine and Fisheries (DVMF) Dr. Jessica Maribojoc daghan ang gihimong lakang aron malikayan nga makasulod ang bird flu sa Cebu City. —BDB (BANATNEWS)