Pagbutang og tourist stop sa CCLEX gitun-an

CEBU, Philippines — Gipadayag ni Engineer Ricky Dakay usa sa miyembro sa board sa CCLEX nga gitun-an nila ang posibilidad nga mag-umol og tourist stops sa maong imprastraktura.

Kini aron mahatagan og higayon nga makakuha og hulagway ang mga tawo nga moagi diha sa ikatulong taytayan. Suma pa ni Dakay nga daghan pa og plano ang board nga mag-agi og lapad nga mga pagtuon.

Samtang gihangyo usab niya ang mga motorista nga mag-andam og sensiyo o sakto nga kantidad sa toll fee aron malikayan ang paghuot sa dagan sa trapiko.

Gidugang niya nga usa sa ilang naobserbahan nga ang kalangay sa pagbayad sa toll fee moresulta gyud sa pagdaghan sa mga sakyanan nga maungot sa taytayan.

Nasayran nga manual pa ang pagkolekta sa toll fee sa pagka-karon, sanglit gihan-ay pa ang radio frequency identification (RFID) stickers nga gibana-bana nga ma-activate karon pang Hulyo.

Tungod sa nangaging kalamidad , nalangan ang pagtrabaho niini nga mao usab ang rason nga nisaka ang gasto sa konstruksyon, busa usa sa nahukman nga gikan sa 35 ka tuig, gihimo na ngadto sa 45 ka tuig ang concession period sa taytayan.

Ang giaprobahan nga mga rates mao kining mosunod: P90 alang sa Class I nga mga sakyanan sama sa jeepney, pick-up, van, ug motorsiklo.

Samtang P180 usab ang Class I nga mga sakyanan nga labaw sa 7ft ang gitas-on (gawas kon ang pinakataas nga load recreational equipment sama sa bikes, surfboards, ug uban pa nga kinahanglan nga lig-on nga ihigot ug dili alang sa komersyal nga paggamit)

Moabot usab og P180 ang bayranan alang sa Class II nga mga sakyanan sama sa light trucks, tourist/school ug public utility buses, P270 alang sa Class III nga mga sakyanan sama sa heavy ug multi-axle trucks ug trailers.

Adunay gilahi nga lane ang CCLEX alang sa mga nagbisikleta ug mga pedestrian ug libre kini nga gamiton apan dili mahimong sakyan ang biseklita gumikan kay peligro kini mapalid ug goruyon ra kini sa mga tag-iya niini. —MEL (BANATNEWS)