Kapitan nagpsalamat kang Rama pagtuman sa saad

CEBU, Philippines — Gipadangat sa kapitan sa Barangay Inayawan, Dakbayan sa Sugbo Kirk Bryan Repollo ang iyang pagpasalamat ngadto sa administrasyon ni Mayor Michael Rama gumikan kay nisaad kini nga tabangan ang iyang barangay bisan wala siya makadaog sa maong dapit sa niaging piniliay.

Nasayran nga si Repollo supporter sa Bando Osmeña Pundok Kauswagan (BOPK) nga kaatbang sa Partido BARUG ni Rama.

Nipadayag sa iyang kalipay si Repollo gumikan kay nagpadayon ang  pag-aspalto sa  kagamhanan sa Siyudad sa Sugbo  sa Upper Inayawan diin ang una nga giaspalto ang  Doña Rosa sa maong barangay. Sa iyang Facebook post, lakip usab sa iyang gipasamalatan ang outgoing nga bise mayor ug napili nga konsehal sa siyuad Donaldo “Dondon” Hontiveros ingon man ang umaabot nga bise mayor Raymond Garcia.

Matud ni Repollo nga personal niya nga nahinabi ang maong opisyales dihang nagkaabot sila sa usa ka kalihokan sa Department of Interior and Local Government (DILG) ug nipadangat siya sa ang iyang hangyo.

Ug gumikan sa maong kalamboan mahimong tulin ang pag-agi sa mga motorist diha sa maong mga karsada.

Sayo pa, giklaro ni Rama nga walay pili sa kolor ang paghatag niya og serbisyo sa katawhan.

Matud ni Rama nga nahuman na ang piniliay ug nitutok na siya karon sa iyang atensiyon  sa pagsabwag og mga programa sa iyang konsituwente. —BDB (BANATNEWS)