Sunday Market sa Carbon pormal na nga gibuksan

CEBU, Philippines — Mas gipasadya og maayo ang Carbon Sunday Market human sa pormal nga pagbukas niini sa miaging gabii.

Kahinumdoman nga nag-soft opening kini og pipila ka semana ug tungod sa paghangop niini sa katawhan, gilusad dayon dili pa lang dugay ang pormal nga pagbukas niini.

Gipasiugdahan kini sa Cebu2World Development, Inc., nga gihuptan sa Megawide maoy nagpaluyo sa modernisasyon sa Carbon.

Ang seremonya gihimo sa Carbon Market Bagsakan Area ug interim market ug nangulo sa pagbukas niini mao sila si Megawide President Louie Ferrer ug Cebu City Mayor Michael Rama.

Gihimo usab ang pag- turnover sa gidonar sa Cebu2World nga duha ka mga dump trucks ngadto sa Kagamhanan sa Siyudad sa Sugbo.

Lakip sa nitambong mao ang bag-ong napili nga bise mayor nga si Raymond   Garcia, ang outgoing nga bise mayor ug subling napili pagka-konsehal nga si  Dondon Hontiveros, kauban ang mga konsehal nga sila si  Joel Garganera, Rey Gealon,  Ermita Brgy. Captain Mark Miral ug opisyales sa nagkadaiyang kapunongan sa market vendors.

Samtang si Mayor Rama sa iyang bahin, nitataw kini nga suportahan niya ang lakang sa modernisasyon sa Carbon Market.

Gipasalamatan niya ang Megawide gumikan sa paghatag og kalamboan niii sa karaang merkado.

Kahinumdoman nga tungod sa paghangop sa publiko, gidugangan og mga adlaw ang nasugdan na nga "Sunday Market" diha sa Carbon, gikan sa matag Dominggo sa gabii   gipuno ang Biyernes ug Sabado , alas 4 sa hapon hangtud sa alas 10 sa gabii.

Nasayran nga naghatag kini og lapad nga kahigayonan sa market vendors nga makapamaligya sa ilang mga produkto lakip na sa mga pagkaon og delicacies sa Sugbo ug uban pa.

Nahimutang ang stalls niini sa Quezon Boulevard sa Carbon Area.

Gitug-an sa mga tigdumala niini nga lingaw na kaayo ang maong dapit gumikan kay dunay mga imbitado nga mga banda hinungdan nag-aghat usab kini og daghang kustomer sa Carbon.

Masaligon ang kagamhanan nga mas modaghan pa ang mga tawo nga motikang sa merkado ug dako kini og matabang ngadto sa vendors. —MEL (BANATNEWS)