Mga JO, casual ug coterminous kutob na lang sa Hunyo

CEBU, Philippines — Gipadalhan na og memo ang mga job order, coterminous ug casual nga mga empleyado sa Cebu City Hall diin gipahimangnoan kini nga kutob nalang sila sa Hunyo 30, 2022.

Hinoun magpabilin gihapon sila sa trabaho kon makapasar sila evaluation apan kinahanglan sila nga moduso pagbalik og application.

Ipaubos na og lapad nga evaluation ang mga job order, coterminous ug casual nga mga empleyado sa city hall.

Base sa suwat nga gipadala ni Mayor Michael Rama pinaagi sa “secretary to the mayor” Atty. Dominic Diño nga ang criteria alang sa pagahimuon nga evaluation sa mga empleyado kinahanglan nga dili kini kawatan, intrigera, tapulan,hugawan,palaaway, walay nahibaw-an, dili mobayad og utang , ug mobuko-buko.

Giklaro ni Diño nga normal ra ang maong pamaagi isip kabahin sa transition ug pinasubay sa lagda sa Departament of Interior and Local Government ang pag-umol og mga evaluation sa mga JO ug casual.

Giklaro usab ni Diño nga gisusi usab nila ang estado sa mga JO hangtud kanos-a taman ang alokasyon sa mga honorarium niini.

Sa dili pa molapas ang Hunyo 16, 2022 kinahanglan nga makaduso na sa ilang application letter uban sa ilang personal data sheets (PDS) ang maong nga JO, casual ug coterminous aron masusi kini sa evaluation committee.

Gipahibawo na usab ang maong mga empleyado nga dili na mo-report sa ilang trabaho sugod karong Hunyo 1, 2022 kon dili kini makadawat og job appointment.

Sa pagkakaron, ang Cebu City Hall adunay kapin sa 4,000 nga JOs ug 3,000 usab ka casual employees.

Apan wala matino ang gidaghanon sa mga coterminous nga nadestino kasagaran diha sa buhatan sa mayor. BDB (BANATNEWS)