Pito patay, 24 angol sa nasunog nga fast craft

CEBU, Philippines — Pito ka mga tawo ang nakalas samtang 24 ang nangaangol sa pagkasunog sa usa ka fast craft sa kadagatan sa Real, Quezon kagahapon sayo sa kabuntagon Mayo 23, 2022 sumala pa sa Philippine Coastguard.

Ang nasunog mao ang MV MERCRAFT 2 nga gikan pa sa Polillo Island alas-5 sa kaadlawon padung sa Real.

Base sa pasiunang imbestigasyon sa PCG, gikatahong kalit nga misilaob ang engine room sa fast craft.

Nakadawat ang PCG og distress call alas-6:30 sa buntag hinungdan sa gilusad nga search and rescue (SAR) operation.

Dunay sakay nga 127 ka pasahero ug walo ka tripulante ang maong fastcraft atoll sa insidente.

Duha ka RoRo vessels ug upat ka motorbanca ang miresponde sab sa maong fast craft ug nasalbar ang mga sakay niini apan dunay mga nangaangol ug nakalas.

Ang fast craft giguyod padaplin alang sa paspas nga pagpawong sa kalayo ug napawong kini pasado alas-9 na.—IBM (BANATNEWS)