Mga drayber sa traysikol nipiyait na batok e-trikes
CEBU, Philippines — Nipiyait ang mga drayber sa traysikol sa pagdaghan sa mga e-trikes nga namasahero sa Dakbayan sa Talisay kay bisan asa sila pwedeng mopasakay og mga pasahero kay walay regulasyon para nila.
Si Rodrigo Batal, usa ka drayber sa traysikol nagkanayon nga dili makatarunganon nga sila nagbayad sa ilang prangkisa apan ang e-trike wala nga parehas nilang namasahero ug nanginabuhi.
Ang e-trikes o electronic tricycles gigamit nga pamasaheroan ug nahimo nang kompetinsiya sa mga rehistradong traysikol.
Duna nay tulo ka petisyon nga giduso ang nagkalain-laing asosasyon sa mga drayber sa traysikol sa siyudad nga naghangyo nga -regulate ang pagpamasahero sa e-trikes.
Usa sab ka ginang kansang bana namasahero og traysikol nga si Faustina Geraldez nibutyag nga dako gyud og kibhang sa kita sa iyang bana sa pagtumaw sa mga e-trikes.
Si Jonathan Tumulak, pangu sa City of Talisay-Traffic Operation Development Authority (CT-TODA) miingon nga aduna na silay giandam nga ordinansahon nga mag-regulate sa e-trikes nga gikatakda nilang iduso ngadto sa konseho
Nahibaw-an nga dunay 3 mil ka mga e-trikes nga namasahero sa maong siyudad, mas daghan pa sila sa 1,600 ka mga rehistradong traysikol.
Lakip nga ilang tan-awon kung mahimo ba nga adunay oras nga tugotang mobiyahe ang e-trikes, mga rota, ug kun asa sila magparking ug ang rate sa plitehan.
Wa sab mipakita og pagsupak ang pipila ka drayber sa e-trikes sa laraw.— IBM (BANATNEWS)
- Latest