Hadlok magpa-checkup sa tambalanan

CEBU, Philippines — Gibutyag ni Dr. Jeffrey Ibones, Officer-in-Charge sa Cebu City Health Department pipila sa nakita nila nga rason nganong daghan ang nangamatay sa sakit nga dengue sa siyudad itandi sa miaging tuig ug sa tuig 2020, kay sagad sa mga naigo niini mga bata nga 10 anyos paubos ang uban dili pa kasulti unsay gipamati nila.

Laing rason sa nakita ang uban mahadlok magpa-check up sa mga tambalanan sa kabalaka nga basin og i-swab test sila ilabi na ang sintomas sa COVID-19 ug dengue susama ra.

Nunot niini, gipalihok na karon sa Cebu City Health Department ang ilang City Health Workers aron mohimo og search and destroy, pag-adto sa mga residente sa siyudad nga gipanghilantan, dunay gipamati nga magpa check-up.

“Base sa amoang pagsusi late na sila nga magpa-check up, late na sila moadto gatuo sila nga ordinary lang nga hilanat, nagtuo sila nga COVID, ang uban nag-self isolation lang sila tungod kay COVID, hadlok sab sila magpa-swab, mao na moadto sila sa hospital naa nay bleeding, sakit ang tiyan, ulahi na,” matud ni Ibones.

Giangkon niya usa gyud kini sa ilahang hagit apan ang ilahang buhatan naningkamot nga mapasabot ang mga tawo nga kun dunay gibati sama sa hilanat ilabi na duha ka adlaw na magpatan-aw na gyud sa doktor aron sayo nga mahibaw-an kun kini dengue o dili.

Pwede moduol sa Cebu City Health Department tungod kay libre ang ilahang dengue NS1 test.

Ang Cebu City Emergency Operations Center motabang na sab sa CCHD sa kampanya batok dengue. Gikatakda nga bansayon na sab ang mga contract tracers sa EOC alang sa mga sistema sa pakigbatok sa dengue.

“Mao man gyud na ang ting-ulan, mao nay ting-gara sa dengue, maong gikinahanglan kombatihon ta ni,” matud pa sa konsehal.

Ang pipila ka staff sa EOC i-deploy usab sa mga tunghaan sunod semana uban sa koordinasyon sa Local School Board ug Department of Education aron gun-ubon ang nagkadaiyang breeding sites sa lamok.

Nakigtigom na usab si Mayor Michael Rama sa nagkalain-laing grupo ug ahensiya sa gobiyerno aron maghiusa sa kampanya batok dengue.

“We need to have a pulong-pulong regarding dengue. We need to address this,” matud pa sa mayor.

Si Ibones miingon nga kinahanglan kaayo nga motabang ang mga opisyales sa barangay sa maong kampanya pinaagi sa ilang Dengue Task Force sa kabaranggayan.

Giawhag usab ni Ibones ang Department of Interior and Local Government (DILG)–Cebu City nga tabangan sila sa pagpasa sa ilang mensahe ngadto sa mga barangay.

Sa datos sa CHD , 422  ang kaso sa dengue ug  14 ang namatay niini  gikan sa Enero 1  hangtud sa    Mayo 15 karong tuiga. Dako kaayo ang deperensya niini sa 256 ka kaso ug  10  nga namatay sa miaging tuig. — /IBM (BANAT NEWS)