Puya gidagit sa katabang

CEBU, Philippines — Padayong gipangita sa kapolisan sa Alegria ang katabang nga giingong midagit sa upat ka buwan nga anak sa pamilya nga iyang gitrabahoan sa Sitio Sangi, Barangay Madridejos sa maong lungsod.

Ang inahan sa bata nga giila sa kapulisan nga si Marivic Luduvici, ni-post sa social media ug nanawagan nga tabangan sila sa pagpangita sa ilang anak nga giingong gidagit sa ilang katabang nga si Edelyn Homecillo. Giingong niikyas ug gidala sa katabang ang bata niadtong Mayo 17 sa mga alas 9 sa gabii sa nahisgutang adlaw.

"Allegedly iya lang daw ipahilot, pero wa naman daw nibalik daw,mao na ang gialegar, mao nga karon padayon pang gipangita,"matud pa ni Police Staff Sergeant Canicio Amatril. Ang katabang gikatahong taga Sitio Buyongan, Valencia sa nahisgutang lungsod .  “Layo gyud ni sila sa lungsod,bukid na,” si Amatril.

Kung mapakyas ang katabang sa pag-uli sa bata, ang pulis miingon nga mahimo siyang mag atubang sa kaso nga pagdagit. —IBM (BANATNEWS)