Cebu City maoy labing daghan OG  kaso sa dengue

CEBU, Philippines — Niluwat na og kamandoan si Cebu City Mayor Michael Rama nga mas hingusgan sa kagamhanan sa Siyudad sa Sugbo ang ilahang anti-dengue operation human nisaka ang kaso sa dengue sa siyudad niining tuiga.

Si Rama nibutyag nga niluwat na siya og kamandoan nga i-convene ang stakeholders sama sa Cebu City Medical Center, Cebu City Health Department ug Department of Health aron pagtubag sa maong problema.

Hinuon matud ni Rama nga dili na bag-o sa kaniya ang ingon niini nga sitwasyon tungod kay nasinati na usab niya kini sa mga nilabay niya nga termino isip mayor sa Siyudad sa Sugbo.

Nanghinaot si Rama nga bisan ang Sangguniang Panlungsod pinangulohan ni Vice Mayor Donaldo “Dondon” Hontiveros manginlabot usab niini. Sayo pa, gipahibawo sa Cebu City Health ang mga programa nga ilang gihimo aron mamenosan ang kaso sa dengue nga gilangkuban sa search and destroy, orientation sa city health workers ug community ingon man pagtinabangay sa kabarangayan ug komunidad.

Nunot niini, si Rama nagkanayon nga nagsige ang ilahang anti-dengue operations ug wala kini mahunong apan walay fogging nga buhaton gawas lang kon kinahanglanon gyud kaayo tungod kay makaapekto kini sa panglawas sa tawo.

Bisan og nakatutok karon ang siyudad sa problema sa pagkasa sa kaso sa dengue gilakbit usab ni Rama nga ang anti-COVID-19 measures nga gihimo sa siyudad magpadayon tungod kay wala pa matapos ang pandemiya.

Matud ni Rama nga dili angayan molugak sa pagpangandam nga gihimo ilabi na nga na-detect na dinhi sa Pilipinas ang BA.2.12 Omicron Sub variant.

“That will have to be side by side the emphasis of first dili man mahimo dili nato tiwason ning atong vaccination, number 2 high ligting over the pronounce of dengue, and  number 3 apil man na sa atoang platform, very clear on matter about health”, dugang ni Rama.

Subay niini, niabot ngadto sa 3,177 ang kaso sa dengue sa tibuok rehiyon-7 nga natala sa Regional Epidemiology and Surveillance Unit (RESU) sa Department of Health-7 gikan sa Enero 1 hangtud sa Mayo 7 karong tuiga.

“This is 287% higher compared to the same period of last year with 820 cases and four deaths”, matud sa RESU.

Ang namatay sa dengue gikan sa bulan sa Enero hangtud sa May 7 karong tuiga anaa na sa 31. Ang Dakbayan sa Sugbo maoy adunay pinakadaghang kaso base sa datos nga gipagawas sa RESU diin niabot ngadto sa 708 o 22.3 porsyento ang tibuok dengue cases ang natala ug 11 niini ang namatay.

Gisundan sa Siyudad sa Lapu-Lapu nga 444 ang kaso ug Dakbayan sa Mandaue nga adunay 214 ka kaso ang natala sukad niadtong buwan sa Enero karong tuiga. —Le Phyllis F. Antojado/BDB (BANATNEWS)