Pagpahigayon og physical graduation gitun-an

CEBU, Philippines — Ang magtutudlo ug mga tinun-an sa Bitlang Integrated School sa Sudlon 1, Siyudad sa Sugbo nihulagway nga lahi gyud ang face to face classes.

Niadtong Mayo 16, 2022 gisugdan na sa Department of Education Cebu City ang pagpahigayon og limited face to face classes diha sa 13 ka tunghaan sa siyudad.

Ang school head sa Bitlang Integrated School Deodoro Beldeniza nagkanayon nga daghan sila og gibuhat nga pagpangandam sa pagpahigayon sa limited face to face classes.

Gisugdan nila sa pagpangutana sa mga ginikanan kon gusto ba nila nga mag-limited face to face classes sa tunghaan ug adunay trainings nga gihimo ug nakig-alayon sila sa barangay nga nisuporta sa pag-abli sa limited face to face classes.

Ang Bitlang Integrated School adunay 700 ka tinun-an apan anaa lang sa 61 ang apil sa face to face classes nga mga pulos junior high school.

Nasayran nga si Dr. Rhea Mar Angtus, DepEd Cebu City School’s Division Superintendent nibisita diha sa 13 ka tunghaan nga nagpahigayon og limited face to face classes ug kagahapon ang giadto niini mao ang Sinsin Elementary ug National High School ug ang Bitlang Integrated School.

Anaa ra sa 20 ngadto sa 25 ka tinun-an sa high school ang makaapil sa limited face to face classes ug 15 sa elementarya.

Ang kada tunghaan nga nagpahigayon og limited face to face classes aduna kini isolation room diin adto ibutang ang tinun-an nga taas og body temperature.

Subay niini, gumikan sa kadaghan sa mga mogradwar karong tuiga sa mga pampublikong tunghaan sa Siyudad sa Sugbo gipangitaan una og pamaagi sa Department of Education Cebu City Division kong mapahigayon ang physical graduation nga dili makalapas sa IATF protocols.

Nagkanayon si Angtud nga ang mga tunghaan nga ilang gitan-aw adunay sobra sa 400 ka graduates.

Ug lisod kini i-handle kon sundon ang IATF protocols diin ang mahitabo niini ang mga lingkuranan lagyo gyud kay i-obserbar man ang social distancing.

Alang kang Angtud ang graduation usa ka “happy occasion” nga dili kalikayan nga ang mga estudyante magduol, maghangop, maggakos, magtapok.

Hinungdan nga ilang gitan-aw ang angayang himuon sa public school nga mopahigayon og physical graduation.

Nasayran nga karong June 7, 2022 ang klase sa mga tinun-an ug gitan-aw sa DepEd nga himuon ang graduation rites sa mga estudyante sa Hunyo 13 pataas.

Samtang ang Kapitolyo nag-andam karon sa pag-apod-apod sa school supplies ngadto sa mga tinun-an sa pampublikong tunghaan sa Probinsiya sa Sugbo. —Le Phyllis F. Antojado/BDB (BANATNEWS)