Niñal: Hatagan og solusyon ang pagtaas sa presyo sa gosolina

CEBU, Philippines — Ang paghatag og solusyon alang sa padayon nga pagtaas sa presyo sa gasolina maoy usa sa angayan unta nga hatagan og pagtagad  alang sa mga napili nga opisyal sa lokal og national.

Kini maoy gibutyag sa Kapitan Clifford Niñal sa Barangay San Nicolas ug board member of the Cebu Integrated Transport Service Multi-purpose Cooperative (CITRASCO).

Matud ni Niñal nga lisod kaayo ang kahimtang sa mga drayber sa pasaheroan nga sakyanan tungod kay maadto na kini sa pagpatobil ang kasagaran sa ilang kita ug gamay na lang kaayo ang ilang mabibit ngadto sa ilang pamilya.

“Naa gyuy ubang drivers tungod sa ka mahal sa gasolina niundang nalang sa pagpamasahero ug nangita og laing panginabuhian. Luoy gyud kaayo ang ubang drivers”, matud ni Niñal.

Nabatyagan nga nagsagunson ang pagsaka sa presyo sa gasolina apan kon aduna man gani pagkibra gamay ra usab kaayo nga kantidad.

Nasayran nga dunay na nga gilusad sa kagamhanan sa Siyudad sa Sugbo ang  pag-umol og discount card sa gasolina alang sa mga drayber sa pampublikong sakyanan. Ang maong programa nag-ulohan og “Gasolina Mo, Sagot Ko” program diin niabot ngadto sa 3,500 ka discount cards ang ilang na-produce sa niaging buwan.

Tumong niini nga makuhaan ang gibaguod nga problema sa mga drayber nga taud-taod na nga nagsagubang sa mahal nga presyo sa gasolina. BDB (BANATNEWS)