BHWs, mga kawani sa barangay umentohan ang honorarium

CEBU, Philippines — Ang barangay health workers ug ubang trabahante sa barangay sa Probinsiya sa Sugbo ang makabaton og umento sa ilang honorarium subay kini sa saad ni Gobernador Gwendolyn Garcia.

“I promised nga for my 5th term, P5,000 na ang ilang madawat”, matud ni Garcia.

 Sa kasamtangang ang barangay health workers, barangay nutrition scholars, barangay animal health aide makadawat og tinuig nga honorarium nga P4,250.

Sa mga barangay tanod, adunay umento usab sa ilang honorarium gikan sa P3, 250 apan wala ibutyag ni Garcia ang kantidad sa umento.

Ang mga Gender and Development focal person ug Lupon Tagapamayapa karong tuiga sila nasugdan og P1,000 nga honorarium.

Si Garcia nagkanayon nga importante ang trabaho sa barangay workers kinsa sila maoy frontliner sa mga barangay pag-atiman ug pagtabang sa mga residente hinungdan nga angayan sila nga hatagan og honorarium. (Le Phyllis F. Antojado/BDB)

Tulay sa Buhisan gipasusi ni Zafra

Gipasusi na ni Konsehal Phillip Zafra ngadto sa City Department of Engineering and Public Works ang taytayan diha sa Sitio Langub, Barangay Buhisan, Dakbayan sa Sugbo. Matud ni Zafra nga nihangyo kaniya ang katawhan sa maong dapit nga ipasusi ang kalig-on sa taytayan.

Giingong adunay mga tawo nga nabalaka sa kondisyon sa taytayan ilabi na sa kahumok sa yuta sa kilid. Si Zafra nagkanayon nga kinahanglang maatiman dayon kini aron malikayan ang aksidente.

Sa laing bahin, padayon nga gipasuroy sa konsehal ang iyang mga tawo didto sa kabukiran aron masuta ang mga agianan nga angayan nga butangan og suga.

Matud usab ni Zafra nga importante kaayo nga mahayagan ang mga kadalanan aron malikay sa peligro ang mga mangagi niini.

Sukad sa niaging tuig ubay na ang mga lugar nga ilang napasigaan. Ug isip chairman sa committee on peace and order sa konseho gipaniguro ni Zafra nga malayo sa daotang elemento ang katawhan. BDB (BANATNEWS)