Lider sa kulto ‘nanglugos’

CEBU, Philippines — Nasikop sa National Bureau of Investigation (NBI) Mandaue Field Unit ang usa ka lider sa kulto nga tambalan tungod sa kasong pagpanglugos pinaagi sa warrant of arrest.

Ang mga otoridad miingon nga ang akusado nga si Teodoro Rico Feriol, nagpaila sa iyang kaugalingon nga 'Dios Amahan'  giingong mo-manipula sa iyang mga biktima aron himuon ang malaw-ay niyang plano.

Ang pwersa sa NBI miingon nga si Feriol usa ka lider sa kulto nga sakop sa Higawnon Spiritual Consultation Services ug dunay  templo sa Udlom, Brgy. San Isidro, Asturias.

Didto kini gidakop sa NBI sa sayong kaadlawon niadtong Huwebes, Mayo 12,2022.

Si Officer-in-charge sa maong buhatan, Arnel Pura miingon nga ang mga reklamante pulos mga babaye, lakip ang usa ka menor de edad.

Ang Regional Trial Court, Toledo Branch, niisyu og duha ka warrant of arrest alang sa duha ka managlahing kaso sa pagpanglugos.  Ang mga krimen nahitabo kaniadtong 2020, ug 2021.

Si executive officer, Agapito Gierran, miingon nga gigamit ni Feriol ang iyang kulto aron mamiktima.

Matud pa gigamit sa suspek iyang impluwensiya pinaagi sa pagmanipula sa mga biktima nga usa ka espirituhanon obligasyon sa mga biktima nga makighilawas kaniya.

"The manipulation made the subject himself,who represented himself as Dios Amahan, or God the father.. the subject is also spiritual healer, some of his victims are his followers," matud ni Gierran. Matud pa, sa higayon nga maayo ang usa ka pasyente, iyang i-require kini nga moagi og 'misyon' sa ilang templo.

Ang imbestigasyon sab nagpadayag, nga ang mga pagpahimulos gihimo sa panahon sa gitawag nga mga misyon.

Nagtuo si Gierran nga adunay posibilidad nga mas daghan pang nabiktima si Feriol nga wala pa moreklamo tungod sa kahadlok kay nangangkon kining dunay mga koneksyon sa otoridad lakip sa NBI.

"So kaya nga nahadlok gyud ang mga biktima, nga mo come into open, naay uban nangabuntis, but they were hesitant to file a complaints kay areglohon kuno niya dayon," sigon ni Gierran.  Ang akusado mihimakak sa mga akusasyon ug midugang nga dili niya mahimo ang maong mga buhat.

“Di na namo pwede buhaton kay mawagtangan man mi’g power, mawad-an man mi’g  espirito,” sigon pa niya sa media.

Gihimakak usab niya nga usa ka kulto ang iyang grupo ug rehistrado sa DTI ang iyang pagpanambal.

“Dili pud hinuon business kay di man mi mosingil, depende lang unsa ilang dad-on, kay amo ra pud kan-on,” matud ni Feriol. Samtang, usa ka katabang nga lalaki nga gipasanginlang nilugos sa anak sa iyang amo ang nadakpan sa Talisay City Police Station pinaagi sa warrant of arrest sa Barangay Mohon, Talisay City, Cebu, Huwebes sa buntag, Mayo 12,2022.

Ang gidakop mao si Laurence Campaña, 26,  nga ikaunom nga most wanted person sa siyudad.

Si Lt. Colonel Randy Caballes, hepe sa Talisay City Police Station nagkanayon nga ang warrant of arrest giisyu ni  Romso A. Reyes Jr., Presiding Judge sa 7th Judicial Region Branch 7, Talisay City sa kasong statutory rape nga gipagawas niadtong Abril 13,2022.

Matod ni Caballes, ang pagpanglugos nahitabo sulod sa balay sa amo ni Campaña niadtong Pebrero 11,2022. Ang akusado gikasohan na sab og qualified theft sa iyang amo sa wala pa mahitabo ang paglugos.

“ After sa hitabo didto na ni siya sa Lapu-Lapu nagtago ug nanarbaho sa Mepza isip tighugas og plato sa canteen didto,” matud ni Caballes. —IBM (BANATNEWS)