Upat sikop sa buy-bust operation

CEBU, Philippines — Upat ka mga tawo ang nasikop sa hiniusa nga operation sa mga tinugyanan sa PDEA Regional Office VII Cebu Province Team uban ang PNP-RIU 7 nga nihimo og buy bust operation sa may Sitio Back Rubber, Barangay Basak San Nicolas, Miyerkules sa buntag.

Ang nasikop naila nga sila si Moncito Cabalde, alyas Jackie o Boy, 42 anyos, walay trabaho, tigmintenar sa drug den ug subject sa buy bust, lakip usab ang mga parokyano niini nga sila si Elmer Cabalada, 52; Lito Solidad Jr,43, houseboy; ug Philip Roy Caruzca,31; water refiller. Nasakmit gikan sa mga dinakpan ang 9 ka putos sa gituohang shabu nga motimbang ug 10 gramos nga mobalor ug 68 mil ka pesos, buy bust money ug kagamitan sa pagsuyop.

Matud pa ni Leia Albiar-Alcantara, tigpamaba sa PDEA-7, usa ka semana ang ilang gihimo nga case buildup una natigayon ang operation.

Ang subject nasuta nga makadispatsar ug dili mominos 30 ngadto sa 50 gramos matag semana.

Ang nahisgutang drug den haduol sa kapilya, mall ug establisamento.— MEL (BANATNEWS)