Rama mohatag og igong suporta sa kapolisan

CEBU, Philippines — Ang paghatag og igong suporta sa kapolisan maoy gisiguro ni Cebu City mayor elect Mike Rama aron pabiling mamintinar ang kahapsay og kalinaw sa dakbayan.

Lakip sa iyang hatagan og pagtagad mao ang pagpaayo sa mga nangaguba nga public CCTV Camera. Kini gumikan sa nasinati nga hagit sa kapolisan pagsulbad sa krimen diin ubay ubay ang mga CCTV Camera nga nahimutang sa mga Traffic lights sa siyudad ang nangaguba.

Apil na ang pagpamanhig sa magtiayon nga sila si PLT COL Chuck ug Yvonne Cania- Barandog. Gipasalig ni Mayor Rama, nga ipaayo ang tanang CCTV nga nangaguba ug pamutangan pa nila ug dugang CCTV ang kadanan.

Makig-alayon usab ang mayor sa mga pribado nga sector aron matuki ang pagpahimutang sa mga CCTV diha sa mga establisamento.Suportahan sa kagamhanan sa siyudad ang kapulisan nonot sa tinguha nga magpabilin kini nga Finest Philippine National Police sa tibuok nasud.

Buot sab ni Rama nga si reelected Cebu City Councilor Phillip Zafra mao gihapo'y mangulo sa Peace and Order Committee ug kinahanglan kini mahimong aktibo.— Decemay P. Padilla/MEL (BANATNEWS)