Duha namatay atol sa piniliay

Duha namatay atol sa piniliay

Rowena D. Capistrano

CEBU, Philippines — Patay ang usa ka 30 anyos nga barangay tanod nga nagbantay sa ganghaan sa Zapatera Elementary School kun diin gihimo ang pagbotar sa mga tawo dihang kini gipusil sa wala mailhing mamumuno niadtong Lunes sa gabii.

Ang biktima nga si Brian Mabaga 30 anyos tanod sa barangay Lorega gipusil sa wala mailhing mga tawo samtang nag-duty diha sa Zapatera polling center.

Naglingkod ang biktima sa lugar kilid sa fire truck sa Lorega sa dihang kalit kini gipusil ug dali kining gidala sa ospital.

Matud ni Police Major Albert Quilitorio, Hepe sa Parian Police Station nga nakutloan sa iyang kinabuhi si Mabaga kagahapon Martes sa buntag. Ang Cebu City Police Office mosusi sa posibilidad nga may kalabutan sa illegal nga drugas ug personal nga panagbangi ang motibo sa pagpusil patay sa tanod.

“Accordingly, naa siya sa drug personality, pero di pa siya ma confirm, wala pa nato ma confirm na kung unsa ka tinuod,” suma pa ni Lt. Colonel Wilbert Parilla, Deputy City Director for Operations sa CCPO.

“Gi attempt sad ni siya og pusil unya ang naigo, ang napusilan naalaan iyang ig-agaw. So it might be personal sa iyaha, “dugang pa ni Parilla.

Samtang sa laing insidente, namatay ang usa ka 75-anyos nga lalaki nga nakuyapan pagkahuman niini og botar sa voting precinct niini sa Tejero Elementary School niadtong Lunes May 9, 2022. Ang nakalas naila nga si Amado Ganzo, 76 , botante sa Barangay Tinago Precinct.

Matud pa ni Emergency Operation Center Chief Implementer Konsehal Joel Garganera, nga si Ganzo giingong nagpatabang kay nalipong pagkahuman niini og botar. Nihangyo kini nga mopahuway apan kalit lang nga natumba.

Gidali kini sa pagdala sa CCMC apan gideklarar nga dead on arrival.

Si Garganera midugang nga nasunod ra sa mga tawo ang health protocols atoll sa ilang pagbotar. Kini bisan nagdasok ang ubang mga tawo sa pipila ka polling areas.

Nagpasalamat ang konsehal sa Department of Education, principals, teachers, kapulisan, kasundalohan ug ubang law enforcement unit, quick response team, health personnel sa Cebu City Health Department ug uban pa sa hapsay ug malinawon nga piniliay. —Decemay Padilla, The Freeman/MEL