Gullas, Barcenas nag-landslide, Cortes, Chan nakadaog sab
CEBU, Philippines — Nasublian ug napili nga mayor sa Dakbayan sa Talisay ug Dakbayan sa Carcar mapasalamaton sa tanan mga nitabang ug nisuporta sa ilang kadaugan bisan taliwala sa daghan mga isyu nga gipakatap batok kanila.
Kini ang gibutyag ni Talisay City Mayor Samsam Gullas ug Carcar City Mayor Patrick Barcenas. Matud pa ni Gullas, dako niyang kalipay sa suporta nga gipakita sa mga Talisaynon diin landslide gayud ilang nakuha.
Sumala pa ni Gullas ang kamatuoran gayud ang nipatigbabaw ug padayunon gihapon niya ang mga proyekto nga ilang nasugdan uban sa iyang mga kaalyado.
Samtang si Barcenas, mapasalamaton usab sa kadaugan nga iyang naangkon human gipildi niini si Mayor Nice Apura.
Gibutyag ni Barcenas, ilang tinguha uban sa iyang mga kaalyado ang katukuran sa Carcar City Hospital nga kompleto sa mga kahimanan ug ekipo aron dili na unya magsaoy-saoy ang mga Carcaranon sa pagpatambal.
Nagmadaugon sab sila si Mayor Junard ‘Ahong’ Chan sa Siyudad sa Lapu-Lapu ug Mayor Jonas Cortes sa Siyudad sa Mandaue kauban sa ilang bise mayor nga sila si Celedonio Sitoy ug Bise Mayor Glenn Bercede.
Midaug usab nga kongresista sa Lone Congressional District sa Siyudad sa Lapu-Lapu ang iyang asawa nga si Congresswoman Elect Cindi King Chan samtang sa Lone Congressional District sa Mandaue si Kongresista Emmarie Lollypop Ouano- Dizon n nasublian usab sanglit wala man kini kaatbang sa miaging piniliay
Samtang giharos sa slate ni Mayor Chan ang kadaogan 12-0.
Samtang sa Mandaue, 11 ka mga konsehal ni Cortes ang midaug samtang nakadaog sab ang usa ka konsehal sa Bando Bag-ong Mandaue nga si kanhi konsehal Edith Flores Cabahug.— Romeo T. Limpangog/IBM (BANATNEWS)
- Latest