Nidawat na sa ilang kapildihan
CEBU, Philippines — Ang mga naparot nga nagpapili sa Cebu City gikan sa mayor, bise mayor hangtod sa mga konsehal sa South ug North District midawat na sa ilahang kapildihan sa nakalabay nga piniliay sa Mayo 9, 2022.
Si incumbent City Councilor Dave Tumulak kinsa midagan pagka mayor nagpasalamat sa tanan nga misalig ug misuporta kaniya tungod bisan og wala siya’y kwarta o makinarya.
Gipasigarbo niyang dunay mga Sugbuanon nga nitabang, nisakripisyo sa ilang panahon ug nitampo alang sa iyang kawsa ug mi-congratulate siya sa mga nakadaog.
Si Association of Barangay Council(ABC) President ug Kasambagan Barangay Captain Franklyn Ong nga nagpapili pagka bise mayor sa siyudad miasoy nga sayod siya nga daghan ang nasakitan sa resulta apan kinahanglan kining dawaton.
Si incumbent City Councilor Niña Mabatid sa post niini miasoy sayod nga dunay lain nga nahitabo sa piniliay ug dunay nagpahiping plano batok niya apan wala siya’y basulon bisan iyahang mga partymates nga giingong mitalikod kaniya.
Samtang silang Pie Abella, Ramonito Alcoseba ug Gremar Barete nga midagan pagka konsehal sa South District ug Konsehal Alvin Dizon sa North District ang mi-post sa ilahang Facebook account ang mipahibawo nga gidawat na nila ang resulta. Silang tanan sakop sa Bando Osmeña Pundok Kauswagan(BOPK). —IBM (BANATNEWS)
- Latest
