Mga pari wa matandog sa mga “bashers”

CEBU, Philippines — Wala nagpatandog sa mga mahait nga pulong sa ilang “bashers” ang pipila ka mga kaparian dinhi sa Sugbo nga nipublikar sa ilang pagsuporta sa nidagan pagka- presidente ug bise presidente nga sila si Bise Presidente Leni Robredo ug Senador Kiko Pangilinan.

Suma pa sa usa sa mga convenor sa Cebu Clergy for Leni  nga si Father Erik Orio nga dili sila magpaapekto sa mga gipanulti sa ilang “bashers” sanglit nakapunting ang ilang atensyon karon sa pamalandong alang sa malinawon nga piniliay karong adlawa.

“Mga Pinoy man sad mi, ug naa sad mi katungod sa pagpili sa mga tawo nga tan-aw namo sensiro nga mangalagad sa katawhan,” matud pa ni Orio. Una na nga gipadayag sa maong pari nga personal nila nga desisyon ang pagsuporta sa Leni-Kiko tandem ug walay kalabotan niini ang tibuok organisasyon sa Simbahang Katoliko.

Suma pa ni Orio nga angayan nga gamiton gyud ang konsensya sa pagpili sa mga tawo nga gustong modumala sa nasud.

Niya pa nga ang saktong pagpili maoy maghatag usab og dalan alang sa pagkab-ot sa mga programa nga makahatag og kaayohan sa tanan.

Sa nasayran moabot sa 257 ka mga relihiyosong personalidad dinhi sa Sugbo ang nipadayag sa ilang pagsuporta sa Leni -Kiko tandem ug naglangkob kini sa mga pari madre ug uban pa nga mga alagad sa Simbahang Katoliko.

Sa maong gidaghanon, 87 niini mga pari nga sakop sa Cebu Clergy for Leni.

Dunay pu’y mga relihiyosong grupo ug mga kongregasyon ang nipadangat usab sa susamang baruganan.

Suma pa ni Orio nga sa pagpili og kandidato, kinahanglan gyud nga susihon daan ang track record niini. Dugang pa niya nga ang kalidad ni Robredo nahaom sa values sa mga Kristiyano partikular na ang pagbuhat og maayo o pagtabang ngadto sa isigkatawo. MEL (BANATNEWS)