Insidente sa sunog mikunhod sa buwan sa Abril
CEBU, Philippines — Adunay pagkunhod sa mga insidente sa sunog dinhi sa dakbayan sa Sugbo sa buwan sa Abril.
Suma pa sa tigpamaba sa Cebu City Fire Office(CCFO) Senior Fire Officer 2 Wendel Villanueva nga sa miaging tuig sa buwan sa Abril, ang CCFO nakatala og 21 ka fire incidents ug karong tuiga naa lang sa 13 ka sunog ang ilang girespondehan.
Apan gihulawgay ni SFO2 Villanueva nga bisan og 13 ra ka sunog ang natala karong tuiga sa buwan Abril miabot sa P64.2 million ang danyos mas dako kini itandi sa miaging tuig nga naa lang sa P16 million bisan og 21 ka sunog ang natala.
Sa mokabat sa P64.2 million nga danyos karong tuiga P59.5 million gikan sa nahitabong sunog sa Ultra VistaRama ug 7 Arts diha sa dalan Legaspi ning siyudad.
“Gamay ra unta nga sunog pero tungod ato mao na niabot ta og P64 million”, segun ni SFO2 Villanueva.
Ang mga sunog nga nahitabo sa buwan sa Abril mga residential area ug duna say mga commercial ug business establishments.
Hangyo sa Cebu City Fire Office sa katawhan nga magmabinantayon kanunay ilabi na karon nga grabeng kainit sa panahon ang nasinati kini aron malikayan ang sunog. Lakip sa hangyo sa Cebu City Fire Office sa katawhan nga kun mahimo dili magdungan og botar karong Lunes, May 9, nga adlaw sa eleksyon, ingon man sigurohon nga maibot gikan sa mga saksakan ang mga appliances kun ugaling way mahibilin nga tawo sa ilang mga pinuy-anan. MEL (BANATNEWS)
- Latest
