COMELEC andam na para ugma

CEBU, Philippines — Subay niining nagkaduol nga May 9, 2022 National ug Local Elections ang Commission on Elections  sa Sugbu,  subsob na sab ang gihimong paghan-ay sa tanan nga gikinahanglan atol sa piniliay.

Sigon ni Commission on Election (COMELEC) Cebu City North District Election Officer Atty. Edwin Cadungog gi-distribute na nila ang election paraphernalia nga gamiton sa adlaw na unya sa piniliay.

Daghang mga magtutudlo ang niadto sa buhatan sa Comelec aron mokuha sa election paraphernalia sama sa ballot secrecy folder, pens ug ubang pang gamitunon alang sa umaabot nga eleksyon.

Giklaro hinoon ni Cadungog ang accountable forms nga mao ang official ballots i-deliver kaadlawon sa adlaw’ng Lunes hangtod sa alas- 5 sa buntag tungod kay inig alas 6 sa buntag sugdan na dayon ang pagbotar.

Samtang ang mga Vote Counting Machines (VCM) naa na sa mga voting centers.  Mag-una ang distribution sa official ballots sa mga lagyong barangay sa Cebu City dayon paingon sa mga barangay sa downtown area.

Samtang atol sa gihimong final testing and sealing si Cadungog miingon nga dunay mga ‘glitches’ nga nasolusyonan dayon.

“Only minor things, it’s not actually that the machines are defective, kanang dili na gyud magamit, unusable mahimo rang maayo nato,” sigon ni Cadungog.

Sa pikas bahin, gipasalig sa Comelec nga makabotar gihapon kadtong mga tawong taas og temperatura pagabot sa voting centers tungod kay dunay gigahin nga isolation room para didto sila magpabugnaw hangtud mo-normal ilang temperatura.

 “Mag deploy man ang City Health ug ang EOC sa atong mga health personnel sa different schools, mag-deploy pud ta sa atong quick response team so tingali nasayod mo saona ang IATF niingon nga kun pananglitan ang imong temperatura nisobra sa 37.5 degrees Celsius dili ta pwede pero ni prevail gyud ang COMELCEC, ni-prevail gyud ang tanan nga the right to suffrage primordial gyud kaayo na sa tanan mangita ta og paagi unsaon nga makabotar so atong nahuna-hunaan so atong nahukom karon adunay isolation facility ang matag eskwelahan,” sigon ni Konsehal Joel Garganera, pangulo sa Emergency Operations Center Cebu City.

Si Commission on Election Cebu City South District Election Officer Marilou Paredes una ng miingon nga duna sila’y support staff nga giandam nga maoy mokuha sa balota sa botante sa isolation facility aron makabotar gihapon kini.

Sa Talisay City, nagdugang og polis ang Police Regional Office (PRO-7) ug Regional Mobile Force Battalion (RMFB-7) aron pagabag sa pagbantay sa bugnong lugaynon.

Sama sa ubang mga lugar, andam na sab ang dakbayan sa eleksyon ugmang adlawa sumala pa ni Atty. Anna Fluer Gujilde, election officer sa siyudad.

Kini bisan paman og adunay pito sa 202 ka VCMs nga nipalyar atol sa ilang testing and sealing nga napangitaan og paagi. Ang lima napaayo dayon samtang ang duha giilisan.— Gabriel Bonjoc/IBM (BANATNEWS)