Bawal magsul-ob og campaign  t-shirts sa polling areas- COMELEC

CEBU, Philippines — Ang Commission on Election nipahimangno sa mga supporters, botante ug mga kandidato nga gidili ang pagsul-ob og mga senina nga dunay naka imprinting nawong sa mga kandidato o partido diha sa mga voting centers.

Matud pa ni Atty. Jerome Brillantes, Provincial Election Supervisor nga maisip kini nga election offense kay usa kini ka pagpangampanya. Bawal usab ang pagpaso-paso sa mga nagsul-ob og t-shirt ug lakip ang pagpanghatag mga leaflets sa mga kandidato sulod sa tulonghaan. Gipahibalo usab sa Comelec nga magsugod ang pagbotar alas-6 sa buntag ngadto sa alas-7 sa gabii.

Walay priority number nga ihatag pero aduna hinoon priority lane alang sa mga tawo nga adunay special needs sama sa mga PWDs,  seniors ug mga mabdos.

Sumala pa ni Brillantes, ini’g sulod sa eskwelahan kuhaan og temperature ang mga botante agi ug ipasunod gyud ang health protocols. Napulo lang usab ka mga tawo ang tugotan nga dungan makabotar sa usa ka classroom.  Sa pikas bahin, subling gipahibawo sa Comelec nga dunay liquor ban nga ipatuman sa tibuok nasud atol sa bisperas hangtud sa adlaw sa eleksyon.—  Romeo Limpangog ug Gabriel Bonjoc