Kaparian, madre ug religious groups sa Sugbu nisuporta ni Robredo
CEBU, Philippines — Kapin sa 250 ka mga pari nga Diocesano, religious and consecrated group ang nipadayag sa ilang statement of individual support ngadto kang presidential aspirant Vice President Leni Robredo ug vice-presidential aspirant Kiko Pangilinan kagahapong adlawa.
Gihimo nila kini human sa Santos nga Misa nga gipahigayon sa Archdiocesan Shrine of Our Lady of
Guadalupe nga gitambongan mismo sa anak ni Robredo na si Dr. Tricia Robredo kagahapon Huwebes sa buntag. Ang tigpamaba sa pundok sa mga kaparian nga nisuporta sa kandidatura nila Robredo ug Pangilinan nga si Fr. John Jadulco, nitug-an nga gihuwat lang nila ang timing sa pagpagawas sa ilang statement.
Gibutya ni Jadulco, ang mga kaparian ug lakip ang mga religious ug consecrated person nakakita nga importante kaayong mopagawas sila sa ilang baruganan.
Sumala pa ni Jadulco, ang ilang pagpadayag ug suporta resulta human sa ilang taas nga pag-ampo ug pagpamalandong kay nakita nila ang kaligdong sa tumong ni Robredo ug Pangilinan nga moserbisyo sa nasud.
Gitug-an ni Jadulco, ang duha ka mga kandidato naghupot ug chirstian values. Gibuhat nila ang pagpublikar sa ilang personal nga gipili aron madungog ang ilang moral choice.
Pamaagi usab nila kinia pagtabang sa uban nga padayon pang naghunahuna kun kinsay botaran.
Giklaro hinuon ni Jadulco dili ang tibuok Simbahan o ang tibuok Artsidiyosisis ang ilang tingog kondili indibidwal nila kining desisyon way labot ang Simbahan.
"Nakita namo kang Leni ang dedikasyon sa pagpangalagad . Maayo pud ang iyang track record . Amoa kini nga personal choice," matud pa ni Father Erik Orio, usa sa mga convenor sa Clergy for Leni.
Ang anak sa bise presidente nga usa ka doktor miingon nga dako kaayo og luna sa ilang kasingkasing ang Sugbu. Ang Sugbu maoy kataposang dapit nga giduaw sa ilang amahan nga si kanhi Interior Secretary Jessie Robredo sa wala pa kini makalas sa plane crash samtang pabalik na sa Naga City sa Camarines Sur. — Rowena D. Capistrano (BANAT NEWS)
- Latest
