Buhawi nasigpatan sa PAGASA diha sa Talisay

CEBU, Philippines — Nasigpatan sa PAGASA kagahapon sa buntag ang buhawi diha sa may vicinity sa Talisay apan dali ra usab kini nawala.

Suma pa ni PAGASA Chief Al Quiblat nga naay nakita sa Radar Mactan Location: 7.5kms East Southeast of Talisay City apan wala kaabot sa yuta mga alas otso ngadto sa alas otso dies sa buntag.

Gitawag og convective cloud ang gigikanan sa maong buhawi ug milanat ra kini og 20 minutos.

Gibutyag ni Quiblat nga kun nakaabot pa sa yuta ang maong buhawi makamugna kini ug kadaut sa lugar nga matungdan, makaguba sa balay ug makaguba sa kabtangan, ug posibleng makakalas ug kinabuhi.

Hinoon ang Cebu City Disaster Risk and Reduction Office (CDRRMO) miingon nga way angayan nga kabalak-an sa maong buhawi nga nakit-an diha sa kadagatan sa South Road Properties (SRP).

Sa ilang facebook page nagkanayon ang CDRRMO nga dili maisip nga dakung hulga ang maong buhawi hinoon gipahimangnuan niini ang mga residente nga pabiling magmatngon.

Sa nasayran mikatap sa social media ang mga hulagway sa giingong buhawi nga nakapaukay usab sa pipila ka netizens.

Samtang sa pagbana-bana sa kahimtang sa panahon sa kinatibuk-an makasinati ug panagsang mapanganuron ngadto sa madag-umon nga kalangitan inubanan sa pat-ak pat-ak nga pag-ulan ug pagpanugdug-kilat tungod sa localized thunderstorm.

Gitug-an ni Quiblat, malinawon ngadto sa kasarangan ang pagbalod, diin ang hangin 20 ngadto sa 30kph ug ang temperatura moabot sa 25-32c ug heat index nga 38c.— MEL (BANATNEWS)