Pamat-on sa kamatuoran, tema sa Lacson-Sotto miting de avance

CEBU, Philippines — Gipaniguro ni presidential candidate Panfilo ‘Ping’ Lacson nga makamata sa kamatuoran ang mga botante sa iyang pagkompleto sa iyang misyon sa kataposang mga adlaw sa kampanya ug mahunong na ang pagbawsanay sa mga politiko diha sa kampanya.

Kini maoy basihan sa pagpamung ni Lacson alang sa iyang ‘miting de avance’ sa dili pa matapos kining semana nga maoy kataposan sa kampanya sa piniliay karong Mayo 9.

Suma pa ni Lacson nga gihan-ay pa sa ilang campaign team ang pinal nga detalye para sa himoong kataposan nga panagtigum nga ipahigayon sa Cavite ug sa Metro Manila

Malaumon ang presidential candidate nga motuhop sa katawhan ang iyang mensahe alang sa wise nga pagbotar.

“That’s why we’re focusing on dialogues; we’re focusing on issues, on platforms. And whatever happens, at least, ‘yon ang legacy na pwede naming iwanan, na we tried our best to change that culture of revenge between the voter and the voted,” suma pa ni Lacson.

Gikalipay ni Lacson nga nakakita sa mga nakamata na nga mga botante sa Naga City, Camarines Sur, nga bag-ohay lang nila nga gibisita kauban ang senatorial candidate nga Dra. Minguita Padilla.

Samtang sa usa ka press conference niadtong Labor day hugtanon nga giawhag ni Lacson ang Malacanang nga mohimo og tukmang lakang kabahin sa naka pending nga petisyon alang sa umento sa suhulan, dili lang didto sa kaulohan kundili apil na sa ubang rehiyon sa nasud.

Gipadayag niini nga ang P537 minimum wage sukad pa niadtong tuig 2019 ug wa gyud mairog bisan og misaka na og maayo ang presyo sa mga produktong petrolyo.

Gisaway usab ni Lacson ang mga miyembro sa Regional Tripartite Wages and Productivity Board, gumikan sa kapakyas niini sa pagbarog para sa labor sector sa ilang mga pagtuki kabahin sa wage hike petitions.

Ubos sa iyang pamunuan suma ni Lacson, makapaabot ang labor sector og data-driven government policies nga mas practical ug magpakita sa tinuoray nga cost-of-living sa mga workers.

Magtiayong polis ug politiko gi-ambushed

Gi-ambush ug parehong nangaangol ang magtiayong opisyal sa kapolisan ug kapikas niining first nominee sa partylist nga STL (Samahan ng Totoong Larong may Puso) diha sa Cardinal Rosales Avenue, Barangay Mabolo ning Dakbayan sa Sugbu niadtong Domingo sa gabii.

Ang nangaangol mao silang Police Lt. Col. Chuck Barandog ug kapikas niini sa kinabuhi nga si Yvonee Cania, first nominee sa STL ug kaniadto adminstrador sa Cebu City Medical Center.

Mimando kagahapong adlawa si Cebu City Mayor Michael Rama sa Cebu City Police Office (CCPO) nga palawman ang imbestigasyon labot niini.

Si Lt. Col. Barandog kanhi hepe sa Cebu City Mobile Force Company ug kasamtangan karon nga nadestino sa Holding Center sa Philippine National Police Headquarters sa Camp Crame.

Siya maoy nagmaneho sa pickup nga dunay tatak nga STL sa dihang sila gibanhigan.

Nakaangkon si Barandog og 11 ka samad pinusilan sumala pa sa kapulisan samtang ang asawa niini nga Cania nga kanhi kapitan sab sa Brgy. Calamba, Cebu City , nakaangkong og samad pinusilan sa likod.

Usa ka Special Investigation Task Group ang giumol sa CCPO alang niini sumala pa ni Lt. Colonel Maria Theresa Macatangay, tigpamaba sa CCPO.

Sumala pa ni Macatangay, hangtud ning pagtaho, giingong kritikal pa si Barandog. Wala ra maunsa ang police escort sa magtiayon nga naa sa likod.

Base sa pamahayag sa kuyog sa managtiayon giingong ang mga mamumuno nagsul-ob ug jacket ug nagsuot og helmet.

Gibutyag ni Macatangay nga base sa ilang inisyal nga pakisusi, si Barandog maoy prime target sa maong ambush base sa gidaghanon sa mga igo niini sa bala.

Si Macatangay nitug-an nga daghan silang gitan-aw nga anggulo, apil ang pagpapili ni Yvonne sa pagka 1st nominee sa STL, samtang si Barandog aktibo nga polis ug dagha’g mga accomplishment sa kampanya batok sa illegal nga drugas ug illegal nga sugal sa dihang nadestino pa kini sa CCPO. Si Rama miingon nga wala nabantog ang Cebu City nga samok ug bayolente nga lugar panahon sa eleksyon.

 “I have already directed in my pronouncement that our police force should be dispatched going to the bottom and bring justice and identify the perpetrators. And we wish that this whole thing has to be solve because we are now in much upper gear in the political climate and we need everybody to have the feel that the City of Cebu is peaceful and orderly and it is a serious directive,” sigon ni Rama. 

Sa pagkutlo ning maong balita wala pa mailhi ang mga responsible. Ang insidente nahitabo usa ka semana sa dili pa ang May 9, 2022 National ug Local Elections.

Sa mga nangaging piniliay, ang Cebu City wala maapil sa mga lugar nga init ang politika o kaha Election Watchlist Areas.

Si Konsehal Dave Tumulak, kinsa magpapili pagka mayor sa dakbayan nasubo sa hitabo kay nagsingabot na ang eleksyon, kay bisan siya nakadawat man sab og pagpanghulgaapan iyaha rang giampo ang tanan sa Kahitas-an.— Decemay P. Padilla/IBM (BANATNEWS)