Utangan sa drugas ang nitulis ug nidunggab sa taxi driver
CEBU, Philippines — Napasakaan na og kaso ang suspetsado sa pagtulis ug pagdunggab sa usa ka taxi driver niadtong Abril 14, 2022 diha sa may Nivel Hills, Barangay Lahug ning Dakbayan sa Sugbo.
Si Aldwin Codera, 35, residente sa maong barangay gikasohan og robbery with frustrated homicide, violation of RA 10591 o Comprehensive Firearms and Ammunition Regulation Act on Comelec Gun Ban.
Matud pa sa tigpamaba sa Cebu City Police Office Police Lieutenant Colonel Maria Theresa Macatangay, si Codera, nasikop diha sa Barangay Mambaling atol sa hot pursuit operation niadtong Biyernes.
Ang tracker team nakahipos sa hulagway sa suspetsado nga nitugma sa ilang e-rogues gallery nga positibong giila sa biktima.
Ang suspek nadakpan na kaniadto sa mga sakop sa Mabolo Police Station tungod sa kasong carnapping ug duna pa sab kini uban pang mga kaso.
Atol sa hot pursuit operation gikatahong nakigpinusilay kini sa mga polis maong kini napusilan sab. Nakuha gikan niya ang usa ka kalibre 45 nga pistola.
Ang suspek miingon nga “kapit sa patalim” na kini nganong iyang gitulis ang drayber sa taksi tungod sa iyang utang sa ilegal nga drugas. Nakuha niya gikan sa biktima ang kita niini nga P4 mil.
Ang biktima misukol sa suspek hinungdan nga kini nadunggaban 12 ka higayon. —IBM (BANATNEWS)
- Latest
