Komunidad nakatabang batok ilegal nga drugas

CEBU, Philippines — Dako og papel ang komunidad sa kalamposan sa kampanya batok ilegal nga drugas sama sa nahitabo sa miaging adlaw diin kapin sa P100 milyones nga kantidad sa shabu ang nasakmit sa sagunson nga operasyon tungod sa pagtabang sa publiko pagtumbok sa mga nalambigit niini.

Ang Cebu City Police Office (CCPO) nagpasalamat sa publiko sa tungod sa mga impormasyon nga gihatag kanila hinungdan nga natumbok ug natultolan ang mga nalambigit niini. Si Lt. Colonel Maria Theresa Macatangay, information officer sa CCPO, miingon nga ang ilang sunodsunod nga malampusong operasyon resulta sa pakigtambayayong kanila sa publiko.

“Ang indication ana is daghan sa atong katawhan,ang willing gyud mohatag og impormasyon sa dynamics sa pagpamaligya og illegal nga droga in a sense na sa ilahang operasyon, daghang makuha,” matud ni Macatangay.

Dugang pa niya, kini usa ka ‘maayo’ nga timailhan nga ang publiko mismo, dili gusto nga adunay presensya sa ilegal nga drugas sa ilang mga lugar.

Matud ni Macatangay matag dunay impormasyong ihatag kanila sa mga nagpakabana nga katawhan, ilaha kini dayong beripikahon ug himoan og paagi aron madakpan.

Wala pay 24 oras niadtong adlaw nga Sabado nasakmit sa mga otoridad ang di mominos P103 milyones nga balor sa shabu sa managlahing buy-bust operations sa dakbayan sa Sugbo.

Si Police Brigadier General Roque Eduardo Vega, hepe sa PRO-7 miingon nga ilang gihingusgan ang operasyon batok sa tanang matang sa kriminalidad, lakip na batok sa ilegal nga drugas, karon nga nagsingabot na ang 2022 election.

“With less than 3 weeks left before the election polls, we are duty-bound to ensure an orderly and honest election shall be upheld at all times-unimpeded and protected from all threats that may hamper its integrity,” dugang niya. —IBM (BANATNEWS)