Truck nga nagkarga og bas ug graba gihangyo sa CT-TODA

CEBU, Philippines — Mihangyo ang City of Talisay-Traffic Operation Development Authority (CT-TODA) ngadto sa mga driver og dagkong truck nga unta sila responsable sa ilang gipangkarga nga di mahasol ug makapeligro sa ubang motorista.

Kini human nagsunod-sunod ang panghitabo nga ang mga bas ug graba ang magpasad sa karsada.

Matud pa ni Jonathan Tumulak, pangu sa CT-TODA nga makapila na sila makaresponde sa ingon ini nga sitwasyon diin ang drayber sa truck ug truck boy niini biyaan lang ang ilang mga karga nga nangayabo sa karsada. Niadtong miaging adlaw, iyang mga sakop ang naghawan sa bas ug graba diha sa may taytayan nga nagdugtong sa Talisay ug Syudad sa Sugbo. Suma pa ni Tumulak nga delikado sa mga nagmotorsiklo ang maong sitwasyon sa karsada nga dunay balas ug graba hinungdan nga ila dayon kining limpyohan.

Nihangyo si Tumulak nga unta ang drayber ug truck boy sigurohon ang gidaghanon sa ilang karga aron di kini moawas ug mas maayong tabunan kini. Gabriel C. Bonjoc/MEL

“Kadaugan” Art Exhibit gibuksan sa Lapu-Lapu

Hingpit nga gibuksan sa kagamhanan sa Siyudad sa Lapu-Lapu ang ‘Kadaugan Art Exhibit ug Trade Fair 2022 diha sa ground floor sa Island Central Mall nga nahimutang sa Barangay Ibo.

Ang pagbukas sa Art Exhibit ug Trade Fair maoy kabahin sa mga kalihokan sa pagsaulog sa “Kadaugan sa Mactan” nga gikatakda sa Abril 27 sa matag tuig.

Nangu sa ribbon cutting ceremony mao ang First Lady sa Lapu-Lapu nga si Cindi King-Chan uban ni bise mayor Celsi Sitoy ug mga miyembro sa konseho sa siyudad sa Lapu-Lapu.

Makita sa maong lugar ang nagkalain-laing lokal nga produkto nga giladlad nga pulos ginama sa mga Oponganon. Lakip sa mga produkto nga gi-display mao ang bags, decors, guitars ug uban pa nga ginama sa grupo sa kababayen-an ingon man sa mga inmates sa Lapu-Lapu City Jail.

Pipila sa mga paintings nga ginama sa mga local artists ang gi-display usab.

Samtang gidasig ni Lapu-Lapu City Mayor Junard Chan ang mga Oponganon nga mobisita sa ilang trade fair ug exhibit ingon man suportahan ang mga lokal nga produkto. MEL (BANATNEWS)