“Market-Market” himuon kada Domingo
CEBU, Philippines — Gipahibalo ni Cebu City Market Administrator Raquel Arce nga duna na unyay “market-market” kada adlaw’ng Domingo diha sa Quezon Boulevard nga ang mga baligya mga produkto gikan sa Carbon Public Market.
Matud ni Arce duna nay 40 ka mga vendors ang nipadayag nga mosalmot sa maong kalihokan.
Sigon ni Arce nga sa pagkakaron wala sila mokolekta og bayad kay gusto una nilang ipakita ang kabag-ohan nga makita sa likod nga bahin sa Carbon Public Market.
“When we talk of Carbon lagi ari man ta sa Magallanes, Escaño-Calderon so atong gi divert starting sa chapel so padong sa Quezon Boulevard to the interim market ang bag-o nga itsura sa Carbon,” matud ni Arce.
Dili pa lang dugay nga na-turover sa Archdiocese of Cebu ang Santo Niño Chapel diha sa Senior Citizen’s Park ug sigon ni Arce na kada human sa alas 2 nga misa sa adlaw’ng Domingo isunod dayon ang market-market.
“Any kind naa tay mga vendor nikuan for native products unya naa sad atong mga buwak, daghan ang ni-commit for food so pwede ta makakaon sa area unya limpyo, ato gyud usbon, i-facelift gyud nato ang karsada nga makita nga murag kaning terminologies sa mga minors sa millennials nga instagrammable ang area moingon kag asa man ni dapita sa Carbon, every Sunday makita ninyo ang bag-ong itsura sa kana nga area,” matud ni Arce.
Ang market-market magsugod sa alas 3 sa hapon ug manirado sa alas 9 sa gabii. Ang Quezon Boulevard dunay parking area apan kada Domingo mawagtang kini aron paghatag og dalan sa market-market. —IBM (BANATNEWS)
- Latest
