Kaso batok sa miabis sa dila sa drayber giandam na

CEBU, Philippines — Kasong robbery with serious physical injury ang ipasaka batok sa suspek sa pagtulis ug pag-abis sa dila sa usa ka taxi drayber nga nahitabo sa Lungsod sa San Fernando sayo ning semanaha.

Si Police Major Efren Diaz Jr., hepe sa kapulisan sa lungsod sa San Fernando nagkanayon nga ilang paningkamotan nga ilang maduso ang mga dokumento ngadto sa Cebu Provincial Prosecutors Office.

Matud niya nakuhaan na og testimoniya ang biktimang si Andres Alfanta, 52, kinsa positibong mitumbok sa suspek nga si Alexander Rematado, 30,nga maoy usa sa mitulis kaniya.

Iyang gihulagway nga si Rematado mao ang nagsakay sa luyo sa iyang taxi ug maoy nagtion kaniya og armas.

Una niini, si Diaz ug mga kaubanan sa Talisay City Police ug Provincial Intelligence Unit nidakop ni Rematado sa iyang giabangan nga boarding house sa barangay Maguikay, Siyudad sa Mandaue pinasikad sa existing warrant of arrest sa kasong murder didto sa Bohol ug warrant of arrest sa kasong robbery nga nahitabo sa Dakbayan sa Carcar. Ang dinakpan nihimakak sa pasangil ug wala siyay kalibutan sa panghitabo. — /IBM (BANAT NEWS)