Dave tumulak gihulga

CEBU, Philippines — Independenteng kandidato sa pagka-mayor sa Dakbayan sa Sugbu nga si Konsehal Dave Tumulak nabalaka sa iyang seguridad human duna kini nabantayan nga tawong magsige og sunod-sunod kaniya sa iyang mga kalihokan karong panahon sa kampanya.

Sa pakighinabi ni Tumulak ngadto sa mga tigbalita  iyaha kining gikonsiderar nga hulga sa iyang kinabuhi mao nga nagplano siyang modangop sa kapolisan.

Nagkanayon ang konsehal nga usa sa iyang staff ang gitawagan ug nangayo sa iyang mga eskedyul nga dunay panghadlok nga tono ug giingong usa kini ka empleyado sa city hall.

“Kun gusto daw magpabilin akong staff sa iyang trabaho sa city hall, mas maayo daw mo-cooperate siya,” matud pa ni Tumulak.

Dugang pa niya nga kining tawhana magsige og panukit-sukit pagpangutana kun asa ang iyang nahimutangan. Giangkon niya nga tungod niining maong tawo gibati siya og kahadlok ug kabalaka sa iyang pagpangampanya.

“Dili gyud na mahitabo nga maputol akong pagsuroy-suroy sa kabaranggayan. Akong ipadayon ang pagduaw sa mga tawo , bisan pa man sa hulga nga akong nadawat,” matud pa niya.

Matud niya bisan kinsa dunay katungod nga magpapili busa panghinaot niya nga mahunong na unta ang maong pagpanghadlok nga iyang nadawat kay hasta iyang pamilya ug mga higala nabalaka.

“Nidagan ko kay gusto ko moalagad sa mga tawo. Mo-focus lang ko ron sa pagpadangat sa akong mga plataporma alang sa katawhan,” niya pa.

Gitataw ni Tumulak nga tumanon gyud niya ang iyang panaad  sa paghatag og kooperasyon alang sa pagkab-ot sa malinawon nga eleksyon.

Usa si Tumulak sa mga kandidato nga nipirma  og peace covenant sa usa kalihokan nga gipasiugdahan sa kapolisan niadtong Marso.

Nitambong niadtong higayona ang mga representante sa  Department of Interior Local government (DILG), PNP, Commission on Elections (COMELEC) ug Armed Forces of the Philippines (AFP).

Samtang andam ra ang Cebu City Police Office (CCPO) sa paghatag og polis nga mobantay kang Tumulak kun mohangyo kini.

Samtang si Cebu City Mayor Michael Rama miingon nga kinahanglang  panganlan ni Tumulak kun kinsa ang maong empleyado sa city hall nga nanghulga kaniya aron iyang mapatawag.

Matud pa ni Rama nga wala niya tudloi ang iyang mga tawo nga magpakadautan. — /IBM (BANAT NEWS)