P1.45 bilyones nga kadaut gibilin sa bagyong Agaton

CEBU, Philippines — Gipahibawo sa Public Works and Highways Secretary Roger Mercado nga mokabat sa P1.45B ang gibilin nga danyos sa bagyong Agaton ngadto sa infrastraktura.

Matud pa ni Mercado, sa Region 8 lang ang partial nga balor sa kadaut sa mga karsada miabot sa P1.27B samtang P30 milyon ang kadaut sa mga taytayan ug aduna say natala sa Region 12 ug 13 nga danyos.

Nabuksan na ang 47 gikan sa 50 mga dalan sa Western, Central ug Eastern Visayas nga nadaut tungod sa bagyo.

Ang DPWH Quick Response Teams padayon nag clearing sa tulo ka mga sirado nga national roads section sa Leyte ug Southern Leyte.

Gibutyag ni Mercado, nga target nilang buksan karong kataposan sa buwan sa Abril ang mga nahibiling karsada nga dili maagian tungod sa landslides.

Samtang giumol sa kagamhanan sa Dakbayan sa Talisay ang composite team o grupo nga maoy mopugong sa mga motorista nga mo agi sa kabukiran sa higayon nga dunay pagdahili sa yuta.

Kini human si mayor Gerald Anthony “Samsam” Gullas nakigtagbo sa mga opisyales sa barangay Lagtang, Jaclupan, Campo 4 ug Manipis uban ang kapolisan ug sa City of Talisay-Traffic Operation Development Authority (CT-TODA).

Ang mga barangay nga naa sa ubos sama sa Lagtang, Jaclupan ug Campo 4 maoy mobabag sa mga motorista aron di na molahos sa pagtangas sa bukid diin nahitabo ang landslides.

Si Jonathan Tumulak, pangu sa CT-TODA mitug-an nga adunay mga motorista nga mopugos gyud sa paglusot bisan sa kapeligro sa lugar.— Gabriel C. Bonjoc/MEL (BANAT NEWS)